Reklamat qeveritare do ta legalizojnë korrupsionin në media

Komisioni për transport, lidhje dhe ekologji, sot në Kuvend organizoi debat publik për Propozim/ligjin për fushata informative dhe reklamuese të institucioneve publike, në të cilën përveç deputetëve, morën pjesë edhe përfaqësuesit e Shoqatës së Gazetarëve të Maqedonisë dhe mediave.

Kryetari i SHGM-së Naser Selmani kundërshtoi fuqishëm idenë për miratimin e ligjit, i cili është kundërkushtetues dhe suspendon lirinë e mediave, pa të cilën nuk mund të funksionojë asnjë shoqëri informative.

Selmani përsëriti se ligji do të legalizojë zgjerimin e marrëdhënieve korruptive mes qeverisë dhe pronarëve të mediave.

“Në vitin 2013, në tregun medial prej 20 milion eurosh, Qeveria mori pjesë me 7 milionë euro, me çka Qeveria merr pjesë me mbi 30% në financimin e mediave. Është e njohur se ai që financon mediat ai edhe i kontrollon. Qëllimi është i qartë, t’i shndërrojë mediat në tabelë shpalljesh për Qeverinë dhe të vrasë kritikën në media”, tha Selmani.

Ai theksoi se bisedat e përgjuara të cilat u publikuan, padyshim konfirmuan lidhjen mes reklamave qeveritare dhe përzierjen e pushtetit në politikën redaktuese të mediave.

Sipas tij, reklamat qeveritare nuk kanë kurrfarë interesi publik, por përbëjnë propagandë të pastër partiake të partive në pushtet. Ai përkujtoi se vetë ministrat flasin hapur se me reklamat, qeveria e ka patjetër t’i drejtohen elektoratit të tyre dhe të lavdërohet për sukseset.

“Çfarë pune ka Ministri i Shëndetësisë nëse nuk ndërton spitale, t’i pajis ato, thjeshtë të përmirësojë shërbimet shëndetësore për qytetarët. Sipas kësaj logjike edhe Parlamenti duhet të ketë fushata mediatike dhe të lavdërohet për ligjet e miratuara, ose mjekët të lavdërohen se shërojnë të sëmurët. Këtë krahasim e bëj që të dëshmoj se deri në çfarë absurdi kanë shkuar punët”, nënvizoi Selmani.

Ai konfirmoi se edhe qeveria e SHBA ka fushata mediatike për tërheqjen e rekrutëve për luftë, por, presidentit Obama nuk i shkon as ndërmend të organizojë fushata mediatike për të lavdëruar reformën shëndetësore “Obama Care”.

Në vend të reklamave qeveritare, SHGM angazhohet për subvencionimin e mediave, me çka Qeveria do të financojë prodhimtarinë e përmbajtjes mediatike me interes publik.