Reagim

Sigurimi personal i ish kryeministrit Nikolla Gruevski nuk ka hyrë në oborrin e televizionit 21 dhe nuk e kanë urdhëruar gazetarin Kristijan Landov që t’i fshijë incizimet e telefonit të tij celular. Kjo është përgjigjja e Sektorit për kontroll të brendshëm, hetime kriminalistike dhe standarde profesionale të Ministrisë së Punëve të Brendshme pas kërkesës së Shoqatës së Gazetarëve të Maqedonisë të ngrejë procedurë disciplinore kundër dy përfaqësuesve të sigurimit të ish kryeministrit Nikolla Gruevski, të cilët më 17 qershor pa urdhër kanë hyrë në Televizionin 21.

MPB në shkresën e shkurtër drejtuar SHGM-së na njoftoi se kanë kryer kontrollet, por nuk kanë arritur të sigurojnë dëshmi me të cilat konfirmohen tendencat se sigurimi i Gruevskit ka hyrë në oborrin e televizionit 21 dhe kanë urdhëruar gazetarin që t’i fshijë incizimet e ish kryeministrit Gruevski duke kaluar në rrugën “Maqedonia”.

Përveç asaj, MPB ka njoftuar edhe Prokurorinë Themelore Publike në Shkup me gjendjen e konstatuar. Me këtë, policia i sygjeron prokurorisë të mos ngrejë kurrfarë procedure kundër pjesëtarëve të saj, sepse incidenti i tillë nuk ka ndodhur, edhe pse kamerat e sigurisë të televizionit kanë regjistruar qartë gjithë ngjarjen, ndërsa gazetari dhe udhëheqësia e televizionit e kanë denoncuar incidentin dhe kërkojnë përgjigje nga policia për hyrjen e paautorizuar në hapësirat e tyre.

Menjëherë pas incidentit, SHGM-ja dërgoi kërkesë në MPB që të nisë procedurë disciplinore kundër sigurimit të Gruevskit. Futjen e tillë, SHGM e cilëson si sulm të drejtpërdrejtë ndaj lirisë së mediave, sepse policia nuk ka të drejtë të pengojë gazetarët ta incizojnë ish kryeministrin dhe liderin e partisë në pushtet në hapësirë publike.