Reagim ndaj MSHIA-së për grevën e mediave rajonale dhe lokale

Mëngjesin e sotëm, i është dërguar shkresë Ministrisë së Shoqërisë Informatike dhe Administratës
(MSHIA) me të cilën kërkohet të fillojë dialogu me përfaqësuesit e mediave rajonale dhe lokale.
Në këtë shkresë, Shoqata e Gazetarëve të Maqedonisë (SHGM) shpreh shqetësimin e saj për
qëndrimin injorant të institucioneve kompetente ndaj mediave rajonale dhe lokale, të cilët disa javë
janë në grevë me ndërprerje të pjesshme të programit të tyre. Protesta e tyre filloi me mbylljen e
programit për 30 minuta më 26 prill të këtij viti dhe shtysë për një hap të tillë është gjendja e
vështirë ekonomike dhe ekzistenciale në të cilën ndodhen prej kohësh.

Në komunikimin bëhet e ditur se nevojitet një dialog serioz ndërmjet MSHIA-së dhe përfaqësuesve
të Shoqatës Media Objektiv. Në të kundërtën, ekziston rreziku të shkaktohet dëm i mëtejshëm i
informimit të qytetarëve për tema që janë me interes publik lokal. Gjithashtu, theksohet edhe një
herë nevoja e krijimit të një fondi kombëtar të pavarur për të mbështetur projekte cilësore
mediatike me interes publik, konstatim i promovuar edhe më parë nga shoqatat e tjera gazetareske
dhe mediatike.

Përkrahje për themelimin e një mekanizmi të tillë kanë dhënë edhe përfaqësuesit e gjashtë
qendrave rajonale të SHGM-së në takimin e mbajtur më 20 prill. Vetëm përmes mekanizmave të tillë
do të mundësohet ngritja e cilësisë së programit të transmetuesve lokalë dhe rajonalë dhe do të
ndihmonin në mënyrë të drejtpërdrejt gazetarinë, duke krijuar përmbajtje cilësore mediatike, dhe në
mënyrë indirekte do të kontribuonin në përmirësimin e gjendjes ekonomike të gazetarëve dhe
punonjësve mediatik.

Kujtojmë se për shkak të gjendjes së vështirë ekonomike të këtyre mediave, vitet e fundit janë
mbyllur 11 televizione dhe shtatë radio dhe është hapur vetëm një transmetues i ri.