Qeveria premton reforma urgjente dhe serioze në mediat
Përfaqësues të ShGM-së dhe eksperti evropian Piter Vanhojte sot u takuan me ministrin për shoqëri informatike dhe administrate, Damjan Mançevski, në të cilin biseduan për reformat në media.
Kryetari i ShGM-së, Naser Selmani prezantoi masa urgjente që Qeveria duhet t’i ndërmerr me qëllim të përmirësohet ambienti i punës për gazetarët dhe mediat.
Selmani kërkoi nga Qeveria që të gjejë mënyrë të ndërpret praktika e mos dënimit të dhunës ndaj gazetarëve dhe të ndërpret përzierja e Qeverisë në tregun e mediave. Ai gjithashtu kërkoi reforma të thella në Radiotelevizionin e Maqedonisë dhe në Agjencionin për media, sipas propozimeve të ekspertit evropian.
Sipas tij, duhet të vazhdojë trajnimi i gjykatësve dhe prokurorëve me qëllim që të praktikohet praktika e Gjykatës Evropiane për të Drejtat e Njeriut, si dhe të përmirësohet transparenca e institucioneve.
Ministri Mançevski tha se Qeveria është e përkushtuar për të zbatuar reforma serioze në media dhe theksoi që javën e ardhshme në Parlament do të paraqesë ndryshimet në Ligjin për shërbime mediatike audio dhe audiovizuele, sipas propozimit të Vanhojte, i cili ishte i përkrahur nga ShGM,SSNM, MIM, SEMM dhe IKS.
Mançevski premtoi se Qeveria do të organizojë debate për ndryshimet në ligjin për t’iu dhënë mundësi të gjithë të interesuarve t’i shprehin qëndrimet e tyre për ndryshimet e propozuara.
Eksperti evropian Vanhojte theksoi që ideja për bashkimin e Agjencisë për media me Agjencinë për komunikime elektronike është e keqe. Ai gjithashtu sugjeroi se Qeveria duhet të sigurojë së paku një për qind nga buxheti për financimin e RTM-së, sepse është joreale të pritet nga servisi publik që t’i plotësojë obligimet, duke mos pasur mjete të mjaftueshme për punë.
