Qeveria e re të mos nxitojë me heqjen e taksës radiodifuzive

Kryetari i Shoqatës së Gazetarëve të Maqedonisë Naser Selmani u takua të martën me delegacionin e Asamblesë Parlamentare të Këshillit të Evropës, të udhëhequr nga raportuesi për Maqedoninë në Asamblenë Parlamentare të Këshillit të Evropës, Lize Kristofersen.

Në këtë takim Selmani dhe anëtarët e delegacionit diskutuan zhvillimet politike pas zgjedhjeve parlamentare dhe për zbatimin e Rezolutës 1949 e miratuar në vitin 2013, për dialogun pas-vëzhgimit të Maqedonisë dhe në drejtim të bashkëpunimit me Këshillin e Evropës.

Në këtë takim, Selmani tha se kriza politike në Maqedoni e cila eskaloi në dhunë nuk duhet të na befasojë, sepse establishmenti politik i Maqedonisë, i cili i ka rrënjët nga koha e komunizmit, qysh nga pavarësia vazhdimisht në mënyrë institucionale refuzon të demokratizohet dhe t’i zbatojë parimet themelore demokratike të parashikuara në Kushtetutë.

Selmani mendon që sistemi ka treguar anën e keqe gjatë sundimit të Gruevskit, i cili në mënyrë brutale u ballafaqonte me mediat.

Ai tha që sistemi, mediat i kontrollon duke e përdorur strategjionin e karrotës dhe shkopit, ato që promovojnë politikat e qeverisë shpërblehen me para publike, ndërsa me mediat kritike ballafaqohet në mënyrë brutale. Ai rikujtoi që në Maqedoni gazetarët ballafaqohen me persekutim me qëllim që të dënohen të padëgjueshmit dhe të disciplinohen të tjerët. Përveç kësaj, SHGM në 4 vitet e fundit ka regjistruar afër 50 sulme ndaj gazetarëve dhe asnjë nga sulmuesit është sjellë para drejtësisë. Mesazhi është shumë i qartë, rrihni gazetarët dhe nuk do të përgjigjeni për këtë gjë, tha Selmani.

Ai mysafirëve nga Strazburgu u spjegoi që qeveria i korrupton mediat me para publike. Edhe pse qeveria ka ndaloi shpenzimin e mjeteve për fushata mediale, praktika korruptive vazhdoi nepërmjet sistemit të të ashtuquajturit subvencionim i produkcionit vendas në televizionet nacionale. Një pjesë e sistemit korruptiv janë institucionet publike dhe shtetërore, si dhe komunat, të cilët shpenzojnë para për finansimin e mediave me qëllim që të blejnë dashurinë e tyre.

Ai kërkoi që mysafirët t’i bëjnë thirrje qeverisë së re që të braktisin idenë që gjatë seancës së parë të qeverisë të heqin taksën radiodifuzive për shkak se një masë e tillë është në kundërshtim me standardet e Këshillit të Evropës. Sipas tij, SHGM këmbëngul për një zgjidhje të qëndrueshme për radio televizionin e Maqedonisë, e cila do të jetë prodhim i debatit serioz publik.