Qasje e lehtësuar për gazetarët në shërbimet e NP Gazeta Zyrtare
Shoqata e Gazetarëve të Maqedonisë (SHGM) dhe NP Gazeta Zyrtare e Republikës së Maqedonisë së Veriut nënshkruan një Memorandum Bashkëpunimi, me të cilin vendoset një partneritet i fokusuar në përmirësimin e qasjes në informacione juridike dhe avancimin e informimit në interes publik.
Përmes këtij bashkëpunimi, anëtarët e SHGM-së do të kenë qasje falas në të gjitha ligjet relevante, aktet nënligjore dhe dokumentet juridike përmes aplikacionit mobil të NP Gazeta Zyrtare e RMV-së – duke u mundësuar atyre qasje të lehtë dhe të vazhdueshme, pa marrë parasysh kohën apo vendndodhjen. Kjo nismë synon të rrisë transparencën juridike dhe të kontribuojë në një cilësi më të lartë dhe profesionalizëm në raportimin gazetaresk.
“Gazetarët kanë të drejtë dhe detyrim t’i informojnë qytetarët në mënyrë të saktë, me kohë dhe me integritet. Ky memorandum është një hap i rëndësishëm në këtë drejtim, sepse qasja në informacione të sakta dhe të verifikuara juridike dhe në tekste të konsoliduara të ligjeve është thelbësore për qytetarë të mirëinformuar,” deklaroi Mlladen Çadikovski, kryetar i SHGM-së.
Nga NP Gazeta Zyrtare e Republikës së Maqedonisë së Veriut theksojnë se ky bashkëpunim është një shembull i partneritetit funksional mes institucioneve dhe komunitetit mediatik, në drejtim të rritjes së transparencës dhe avancimit të proceseve demokratike në shoqëri.
“Ky Memorandum është një hap konkret për të mbështetur mediat në rolin e tyre kyç – të informojnë, analizojnë dhe të shtrojnë pyetje me interes publik. Besojmë se me këtë mjet, gazetarët do të kenë një bazë edhe më të sigurt për punën e tyre,” tha Vlladimir Kronevski, drejtor i NP Gazeta Zyrtare e RMV-së.
Kjo nismë doli si rezultat i kërkesave të gazetarëve, të cilat iu përcollën Shoqatës së Gazetarëve të Maqedonisë. SHGM i inicioi këto propozime para institucioneve kompetente, ku çështja e qasjes së lehtësuar në shërbimet e NP Gazeta Zyrtare e RMV-së u komunikua me Qeverinë dhe më pas u miratua zyrtarisht në një mbledhje qeveritare.
Shoqata e Gazetarëve të Maqedonisë edhe një herë konfirmon angazhimin e saj për krijimin e kushteve më të mira të punës për gazetarët dhe forcimin e rolit të tyre në shërbim të interesit publik.
