Indeksi i referohet vitit 2020 dhe mbështetet në të dhënat hulumtuese, të mbledhura dhe të analizuara nga partnerët e platformës së shoqatave gazetareske të Ballkanit Perëndimor “Safejournalists.net”, në bazë të një procedure rigoroze hulumtuese. Të dhënat e grumbulluara për disa sfera të ndryshme lidhur me “sigurinë e gazetarëve” janë përpunuar në bazë të formës së indikatorit – Indeksit për sigurinë e gazetarëve, me qëllim që përmes shifrave të maten ndryshimet në shtatë vendet e Ballkanit Perëndimor për vitin e kaluar.

Sipas indeksit, Republika e Maqedonisë së Veriut krahasuar me shtatë vendet e rajonit të Ballkanit perëndimor, tregon përmirësime të situatës së sigurisë së gazetarëve dhe punonjësve mediatik. Megjithatë, lidhur me masat e parandalimit në vend, në indeksin përmendet se vazhdon politika e përgjithshme e mosndëshkueshmërisë së sulmuesve ndaj gazetarëve. Për këtë arsye, SHGM-ja, në vazhdimësi insiston për krijimin e departamenteve të veçanta në Gjykatën Penale dhe Prokurorinë Publike për rritjen e efikasitetit në mbrojtjen dhe të drejtat e gazetarëve. Numri i sulmeve në krahasim me vitin paraprak, në vitin 2020 është rritur, kurse më shumë se gjysma kanë të bëjnë me sulmet ndaj gazetareve.

Vlerat referenciale për indeksin janë nga nota 1 (më e dobët) deri në 7 (më e mirë), në katër fusha të veçanta. Nga shtatë vendet e Ballkanit Perëndimor, Republika e Maqedonisë së Veriut ka notën mesatare 3.93, që edhe pse nuk është një notë e lartë, megjithatë vendin e bën të jetë më mirë i ranguar se vendet tjera të kyçur në këtë proces.

Në vitet në vijim, përmirësimi apo përkeqësimi i situatës në të gjitha vendet do të matet duke marrë parasysh vlerësimin për vitin 2020 si vit referencë. Më shumë detaje mbi kuadrin teorik dhe procedurën për zhvillimin dhe llogaritjen e Indeksit, si dhe të gjitha raportet për vendet e Ballkanit Perëndimor mund të gjenden në: https://safejournalists.net/safety-index/.

Indeksi për sigurinë e gazetarëve në Ballkanin Perëndimor është i publikuar në gjuhën maqedonase dhe në gjuhën angleze.