Përfaqësues të qendrës rajonale të SHGM-së nga Tetova në takim në MPB

Përmirësimi i bashkëpunimit me policinë lokale, gjetja e mënyrave për të përmirësuar dhe për të ruajtur komunikimin ndërmjet gazetarëve dhe kameramanëve nga rajoni i Tetovës dhe policisë, ishin temat kryesore të takimit të punës që u mbajt sot në Ministrinë e Punëve të Brendshme (MPB) në Shkup.

Koordinatori i qendrës rajonale të SHGM-së në Tetovë, Senat Zulbeari, gazetari Urim Hasipi dhe koordinatori i seksionit të kameramanëve nga rajoni i Pollogut, Vedut Osmani, së bashku me kryetarin e SHGM-së Mlladen Çadikovski dhe drejtorin e SHGM-së, Dragan Sekullovski zhvilluan takim me Toni Angelovskin, zëvendës ministër për marrëdhënie me publikun në Ministrinë e Punëve të Brendshme. 

Kryetari Çadikovski përshëndeti bashkëpunimin pozitiv ndërmjet SHGM-së dhe MPB-së dhe theksoi se me takime më të shpeshta dhe evidentim të saktë të problemeve në të ardhmen mund të gjejmë zgjidhje për të gjitha çështjet.

“Fakti që ka ankesa të herëpashershme nga gazetarët për qëndrimin e disa prej përfaqësuesve më të rinj të policisë, tregon se nevojitet një proces i vazhdueshëm i ngritjes së kapaciteteve të policisë si dhe të gazetarëve dhe punonjësve mediatik në drejtim të përmirësimit të komunikimit të ndërsjellë dhe bashkëpunimit në përgjithësi”, tha Çadikovski.  

Gjatë takimit, me shembuj konkretë u theksuan sfidat aktuale me të cilat ballafaqohen kolegët gazetarë dhe kameramanë nga rajoni i Tetovës, ndërsa u diskutua edhe për zgjidhjet konstruktive për tejkalimin e tyre. Temë e diskutimit ishte edhe përmirësimi dhe lehtësimi i kushteve të punës për gazetarët dhe kameramanët gjatë mbulimit të ngjarjeve të organizuara në rajonin e Tetovës, veçanërisht për ngjarjet që përfshijnë vizita zyrtare në qytetin e Tetovës, për të cilat ekzistojnë protokolle të veçanta të sigurisë.

Angelovski njoftoi se në periudhën e ardhshme do të organizohet takim me kryesinë e SVR Tetovës ku do të ftohen të gjithë punonjësit mediatik të interesuar. Gjatë takimit do të diskutohen hapur të gjitha aspektet që kanë të bëjnë me komunikimin dhe bashkëpunimin ndërmjet policisë dhe gazetarëve nga ky rajon.

Kryetari Çadikovski gjatë takimit potencoi edhe problemin që e kanë gazetarët nga Velesi me mos disponueshmërinë e herëpashershme të zëdhënësit të SVR Veles. Nga ana e MPB-së u theksua se ka informata për këtë gjë dhe se po bëhen përpjekje për të përmirësuar transparencën dhe hapjen e policisë ndaj gazetarëve në Veles.