Nuk duhet të lejohet një ligj për reklamim shtetëror në media
Shoqata e Gazetarëve të Maqedonisë (SHGM), Sindikata e Pavarur e Gazetarëve dhe Punonjësve Mediatik (SPGPM), Instituti Maqedonas i Mediave (IMM) dhe Këshilli për Etikë në Media (KEMM) edhe një herë e theksojnë kundërshtimin e tyre të fuqishëm për ndryshimet eventuale të nenit 102 të Ligjit për shërbime mediatik audio dhe audiovizuele, me të cilat do të lejohej reklamimi i institucioneve publike në media.
SHGM, SPGPM, IMM dhe KEMM konsiderojnë se është e papranueshme që gjendja në industrinë mediatike të kthehet në nivelin e katër viteve më parë, kur me mjete shtetërore, në mënyrë jo transparente, paguheshin shuma astronomike në media pa asnjë kriter. Kjo praktikë, të cilën ne e kundërshtonim, u vlerësua si shembull i keq i ryshfetit shtetëror të mediave dhe kontribuoi në përkeqësimin e gjendjes në media dhe në rritjen e anshmërisë gjatë raportimit të tyre.
Ky reagim i katër organizatave pason pas paralajmërimit të djeshëm të kryeministrit Zoran Zaev se “së shpejti do të jepet propozim nga MShIA për shfuqizimin e nenit 102, respektivisht ndryshimin e të njëjtit që të mund të ndihmojmë mediat duke arritur marrëveshje me ndërmarrjet publike, komunat dhe të ngjashme, në drejtim të transparencës dhe zbatimit të vendimeve të tyre siç janë mbledhjet e këshillave drejtues, të këshillave etj.”
Rikujtojmë se kjo deklaratë e Kryetarit të Qeverisë është në kundërshtim me politikat qeveritare, por edhe me premtimet e mëparshme zgjedhore të LSDM-së se nuk do të ketë para publike në media private, e që janë përsëritur shumë herë dhe publikisht.
Vlerësojmë se, nëse një propozim i tillë pranohet, ai nuk do të sjellë ndonjë përmirësim të gjendjes në media dhe lirinë e informimit por, përkundrazi, i njëjti do të çrregullojë edhe më shumë tregun tashmë të brishtë mediatik dhe do të forcojë klientelizmin. Le të rikujtojmë se paratë e qytetarëve përfundonin në llogari private, por nuk shpenzoheshin për përmirësimin e cilësisë së programit dhe përmbajtjeve me interes publik e as për paga më të larta të punonjësve të mediave.
SHGM, SPGPM, IMM dhe KEMM nuk janë kundër mbështetjes së caktuar financiare për mediat, detyra kryesore e të cilave duhet të jetë mbrojtja e interesit publik dhe interesit të qytetarëve. Sidoqoftë, ne besojmë se kjo ndihmë duhet të lindë nga një debat paraprak publik dhe të udhëhiqet nga parimi – “ndihmë për gazetarinë profesionale”, respektivisht mjetet financiare duhet të përdoren ekskluzivisht për projekte me interes publik, bazuar në konkurset e mëparshme publike dhe për përmirësimin e gjendjes socio-ekonomike të gazetarëve dhe punonjësve mediatik.
