Një grup studentësh të gazetarisë nga Holanda vizitojnë SHGM-në
Një grup studentësh të gazetarisë në vitin e parë nga Holanda prej “Fontys University” (https://fontys.edu/) ishte në vizitë në Shoqatën e Gazetarëve të Maqedonisë. Në takim u diskutua për aktivitetet aktuale të SHGM-së, ligjet lokale të medias, të drejtat e gazetarëve të Maqedonisë, si dhe sfidat me të cilat përballen në ushtrimin e profesionit të gazetarisë.
Në Fakultetin e Gazetarisë, i cili është në qytetin holandez të Tilburgut, ka gjithsej 19 grupe studentësh të gazetarisë. Një nga ato grupe, i përbërë nga 12 gazetarë të rinj të ardhshëm, po viziton këto ditë Shkupin.
Studentët e huaj rrëfyen se fakulteti u ofron atyre mundësinë për të bërë praktikë në media dhe për realizuar vizita të shkurtra studimore jashtë vendit. Me iniciativën e tyre vendosën të vizitojnë Maqedoninë sepse për ta është një destinacion i pazakontë dhe donin të njihnin nga afër specifikat e komunitetit gazetaresk dhe sektorit mediatik në përgjithësi.
Ata treguan se secili prej tyre, si student në këtë fakultet, në kuadër të studimeve ka privilegjin për të pasur akses në bazën e të dhënave të studentëve që përfshin mijëra platforma dixhitale të mediave botërore por edhe të punimeve akademike. Përveç kësaj, ata shpjeguan se secili prej tyre është abonuar në të paktën një media holandeze në muaj dhe abonimi kushton mesatarisht 8 euro në muaj.
Ky grup shtoi se pothuajse asnjëherë nuk e përdorin rrjetin social “Facebook” dhe nga mediat sociale kryesisht përdorin “Instagram”-in, por jo për informacion, por më shumë për argëtim dhe për të mbajtur kontakte.
Ata gjithashtu treguan se pothuajse gjysma e gazetarëve në Holandë janë “freelancers” apo gazetarë të mëvetësishëm dhe se nuk kanë një punë klasike të përditshme gazetareske, por që herë pas here ata bashkëpunojnë me media që blejnë materialin e tyre gazetaresk.
Universiteti i Shkencave të Aplikuara Fontys është një universitet holandez i shkencave të aplikuara, i cili ndodhet në pjesën jugore të Holandës. Ka mbi 44,000 studentë në disa kampuse. Tre kampuset më të mëdha të Fontis ndodhen në qytetet Eindhoven, Tilburg dhe Venlo.
Foto: SHGM
21.06.2023, Shkup
