NISMA E PËRBASHKËT E SHGM-SË, IREKS-IT DHE RTVM-SË PËR TË NGRITUR STANDARDET NË SERVISIN PUBLIK
Një grup prej mbi 30 gazetarësh dhe kameramanë nga servisi publik, nga RTVM 1, RTVM 2 dhe Radioja Maqedonase, gjatë kësaj fundjave morën pjesë në një trajnim treditor për të ngritur standardet në raportimin dhe punën, si dhe në luftën kundër dezinformatave. Trajnimi, i cili është i pari i këtij lloji për të punësuarit në servisin publik, u organizua bashkërisht nga IREKS me mbështetjen e USAID-it, Shoqatës së Gazetarëve të Maqedonisë (SHGM), Institutit Maqedonas për Media dhe RTVM-së.
Gjatë punëtorisë u mbuluan tema aktuale nga fusha e jetës gazetareske, rrëfimin e historive, krijimin e një “storibordi” dhe paragrafi përmes sekuencave, si të krijohen podkaste, ndërsa u trajtua edhe tema e përgatitjes dhe zhvillimit të një historie hulumtuese. Në të njëjtën kohë, u trajtuan edhe tema specifike që kanë të bëjnë më konkretisht me punën e redaksive në kuadër të RTVM-së.
Trajnuesit, Mlladen Çadikovski, kryetar i SHGM-së, kryeredaktorët dhe gazetarët Sashka Cvetkovska, Ana Zafirova dhe Toshe Ognjanov, si dhe drejtori i SHGM-së Dragan Sekullovski mbajtën ligjërata në disa tema siç janë: peizazhi mediatik dhe roli i servisit publik, ndryshimi i mediave dhe llojet e shkrim-leximit mediatik, për procesin e krijimit dhe përhapjes së dezinformatave, për krijimin e historive hulumtuese, ndërsa u bënë edhe ushtrime për regjistrimin dhe krijimin e videove në kohë reale.
Pjesëmarrësit e trajnimit, gazetarët, kameramanët dhe kryeredaktorët, me pjesëmarrjen e tyre aktive dhe kreative i dhanë një impuls shtesë tërë ngjarjes. Së bashku, ata u pajtuan se ky format i ngjarjeve është jashtëzakonisht i rëndësishëm për forcimin e frymës gazetareske dhe pavarësisë së redaksive dhe se ato duhet të vazhdojnë edhe në periudhën e ardhshme. Në këtë mënyrë, servisi publik me mbështetjen e Shoqatës së Gazetarëve të Maqedonisë, Institutit Maqedonas për Media dhe IREKS-it do të sigurojnë vazhdimësi në procesin e ngritjes së standardeve dhe politikave gazetareske dhe redaktuese.
Projekti për edukimin mediatik “Të rinjtë mendojnë”, në kuadër të së cilit u mbajt edhe kjo ngjarje, është projekt pesëvjeçar i financuar nga USAID dhe i implementuar nga IREKS, Instituti Maqedonas për Media, Instituti për Studime të Komunikimit dhe Forumi Arsimor Rinor.
