Mbrojtja e gazetarëve dhe zërave kritikë në Evropë: Konferenca të Këshillit të Evropës në Strasburg 

Mbrojtja e gazetarëve nga paditë strategjike për heshtje (SLAPP), mbrojtja ligjore e zërave kritikë dhe forcimi i lirisë së shprehjes, nevoja për ndryshimin e legjislacionit në vendet e Evropës, janë pjesë e temave dhe bisedave që këto ditë zhvillohen në Këshillin e Evropës në Strasburg. 

Dragan Sekullovski, drejtor i Shoqatës së Gazetarëve të Maqedonisë (SHGM) dhe ish-anëtar i Komitetit të Ekspertëve për Padi Strategjike kundër Pjesëmarrjes Publike (MSI-SLP) të Këshillit të Evropës, i ngarkuar për hartimin e rekomandimeve aktuale, së bashku me përfaqësues të gjyqësorit, Ministrisë së Drejtësisë dhe zyrës së Këshillit të Evropës në Shkup, merr pjesë në dy konferenca të rëndësishme të dedikuara mbrojtjes së lirisë së shprehjes dhe mediave. 

Konferenca e parë, e organizuar në kuadër të aksionit rajonal “Mbrojtja e Lirisë së Shprehjes dhe Mediave në Ballkanin Perëndimor (PRO-FREX)”, që është pjesë e programit të përbashkët të Bashkimit Evropian dhe Këshillit të Evropës ” Horizontal Facility for the Western Balkans and Türkiye 2023-2026″, u mbajt në Strasburg. 

Konferenca e dytë, e titulluar “Shkëmbimi Rajonal: Luftimi i përdorimit të Padive Strategjike kundër Pjesëmarrjes Publike (SLAPP) në Ballkanin Perëndimor”, do të mbahet më 15 nëntor 2024 në Strasburg dhe do të jetë e përkushtuar për shkëmbimin e përvojave në parandalimin e abuzimit me padi si një mjet për presion ndaj gazetarëve dhe mediave. 

Këto dy konferenca janë të rëndësishme pasi mundësojnë shkëmbimin e përvojave dhe nxitjen e reformave ligjore që do të sigurojnë mbrojtje më të fortë për gazetarët dhe të gjithë ata që marrin pjesë në sferën publike.