Liritë mediatike dhe inteligjenca artificiale në fokusin e publikimeve të reja të SHGM-së dhe IPE-së

Iniciativa për Perspektivë Evropiane (IPE), në bashkëpunim me Shoqatën e Gazetarëve të Maqedonisë (SHGM), sot prezantuan publikimet “Raporti për Kapitullin 1 – Vlerat Themelore, me fokus në sundimin e ligjit dhe lirinë e shprehjes, të drejtat dhe liritë mediatike dhe sigurinë e gazetarëve dhe punonjësve të medias” dhe dokumentin e politikave “Përdorimi i përgjegjshëm i IA-së në gazetari”.

Në ngjarjen e sotme, fjalimet hyrëse para të pranishmëve i mbajtën Elena Milenkoska Mihaillovska, kryetare e Iniciativës për Perspektivë Evropiane (IPE), dhe Dragan Sekullovski, drejtor ekzekutiv i SHGM-së.

Kryetarja e IPE-së u ndal te aktivitetet që u realizuan dhe aktivitetet që do të pasojnë në periudhën e ardhshme.

“Vitin e kaluar, aktivitetet e IPE-së ishin të orientuara drejt sigurimit të mbështetjes për sektorin civil, përkatësisht organizatat që propozuan veprime inovative për forcimin e integritetit të medias, luftën kundër dezinformatave, njohjen dhe veprimin ndaj tyre, avancimin e edukimit mediatik, mendimin kritik, vlerat demokratike dhe bashkëpunimin ndërkulturor. Për këtë qëllim, ne dhamë 4 grante për 4 organizata të shoqërisë civile. Gjatë zbatimit të projekteve të tyre, përfituesit e nën-granteve morën gjithashtu mbështetje mentorimi për forcimin e kapaciteteve të organizatave të tyre, me qëllim përmirësimin e praktikave, politikave dhe procedurave të tyre në fushat kyçe të punës së tyre. Në kuadër të projektit është parashikuar përgatitja e 2 raporteve vjetore për vitin 2024 dhe 2025, të lidhura me monitorimin e progresit të vendit në procesin e anëtarësimit në Bashkimin Evropian, të cilat janë përfshirë në këto botime” – theksoi Milenkoska Mihaillovska.

Drejtori ekzekutiv i SHGM-së, Dragan Sekullovski, në fjalën e tij hyrëse tha:

“Të dyja publikimet për të cilat kolegët e mi do të flasin sot janë pjesë e projektit “Akademia e Trajnimit për Gazetarë dhe Punonjës të Medias, T-AJM”, e cila fokusohet në një nga çështjet më të rëndësishme që ndikon në integritetin dhe pavarësinë e gazetarëve dhe punonjësve të medias – dhe kjo është siguria e tyre.”

Autori i publikimit “Raporti për Kapitullin 1 – Vlerat Themelore, me fokus në sundimin e ligjit, lirinë e shprehjes, të drejtat dhe liritë mediatike, si dhe sigurinë e gazetarëve dhe punonjësve të medias”, Davor Pashoski, në prezantimin e tij theksoi:

“Liritë mediatike dhe pavarësia e gazetarëve janë kyçe për zhvillimin demokratik të vendit dhe procesin e anëtarësimit në BE. Në këtë drejtim, ky raport ofron një pasqyrë të detajuar të situatës në sektorin mediatik dhe tregon hapa konkretë për përmirësim. Prandaj, është veçanërisht e rëndësishme që institucionet, organizatat mediatike dhe shoqëria civile të bashkëpunojnë në përmirësimin e rregulloreve mediatike.”

Benjamini Arifi, i cili është autor i analizës “Përdorimi i përgjegjshëm i IA-së në gazetari”, u ndal te ndikimi i inteligjencës artificiale në gazetarinë e sotme.

“Inteligjenca artificiale tashmë po e ndryshon gazetarinë dhe ne si shoqëri dhe si shtet duhet të jemi të përgatitur për këtë epokë të re. IA ka potencial të jetë shumë e dobishme për gazetarët dhe mediat nëse përdoret me përgjegjësi, por mund të shkaktojë edhe shumë dëme nëse përdoren boshllëqet ligjore për të abuzuar me këtë teknologji. Prandaj, mendoj se të gjithë aktorët duhet të veprojnë shpejt me rregullore, duke ndjekur shembujt më të mirë në botë.”

Qëllimi i këtij raporti është të analizojë progresin e Maqedonisë së Veriut për vitin 2024 në procesin e anëtarësimit në Bashkimin Evropian (BE) dhe fokusohet në parimet themelore, të cilat janë kyçe për procesin e anëtarësimit të Maqedonisë së Veriut në BE: demokracia, të drejtat e njeriut dhe sundimi i ligjit.

Objekti kryesor i analizës në këtë raport, përmes së cilës do të monitorohet progresi dhe do të evidentohen sfidat në fushën e sundimit të ligjit dhe lirisë së shprehjes, të drejtave dhe lirive mediatike dhe sigurisë së gazetarëve dhe punonjësve të medias, janë disa segmente kyçe në këtë fushë, të cilat përmenden në Raportin e Komisionit Evropian për Sundimin e Ligjit për vitin 2024 dhe Raportin e Komisionit Evropian për Progresin e Maqedonisë së Veriut për vitin 2023. Paralelisht me këto dy raporte, analizohen edhe dokumente të tjera relevante për të ofruar një pasqyrë të detajuar të të gjitha sfidave në fushën e lirisë së shprehjes dhe lirisë së medias si një segment i rëndësishëm i procesit të anëtarësimit të Maqedonisë së Veriut në BE.

Ky publikim është përgatitur në kuadër të projektit “Akademia e Trajnimit për Gazetarë dhe Punonjës të Medias, T-AJM”, i financuar nga Bashkimi Evropian (BE) dhe i zbatuar nga Shoqata e Gazetarëve të Maqedonisë (SHGM), në partneritet me Iniciativën për Perspektivë Evropiane (IPE) dhe Federatën Evropiane të Gazetarëve (FEG).