Kuvendi i SHGM-së miratoi ndryshimet dhe plotësimet e Rregullores për zgjedhjen dhe punën e Këshillit të Nderit

Kuvendi i Shoqatës së Gazetarëve të Maqedonisë (SHGM), në seancën e rregullt të mbajtur më 9 korrik 2026, miratoi ndryshimet dhe plotësimet e Rregullores për zgjedhjen dhe punën e Këshillit të Nderit.

Ndryshimet u propozuan nga anëtarët e Këshillit të Nderit dhe kanë për qëllim ta bëjnë punën e këtij organi më efikase, më transparente dhe më funksionale, përmes përcaktimit më të qartë të kompetencave, procedurave dhe mënyrës së funksionimit.

Me zgjidhjet e reja, Këshilli, krahas shqyrtimit të ankesave, do të mund të nisë procedurë edhe me iniciativën e vet kur konstaton një shkelje të mundshme të Kodit të Gazetarëve të Maqedonisë. Gjithashtu, krijohet mundësia që në punën e tij, kur është e nevojshme, të përfshihen ekspertë të jashtëm dhe Shërbimi Profesional i SHGM-së, me qëllim që vendimet të jenë më të argumentuara dhe të përgatitura profesionalisht.

Ndryshimet parashohin edhe mundësinë që mbledhjet të zhvillohen në mënyrë elektronike, si dhe votimin elektronik në rastet kur kjo është e domosdoshme për veprim në kohë. Po ashtu, rregullohen zgjidhje që sigurojnë funksionimin e pandërprerë të Këshillit edhe në rastet kur ndonjë nga anëtarët e tij nuk është në gjendje të marrë pjesë në punë për një periudhë më të gjatë.

Rregullorja parashikon afate më të shkurtra për veprim, ndërsa rregullohet më tej edhe procedura e shqyrtimit të ankesave, duke forcuar të drejtën e përgjigjes së anëtarit ndaj të cilit është paraqitur ankesa dhe duke siguruar një procedurë më të drejtë e më transparente.

Një nga risitë është edhe vendosja e një sistemi më të qartë për trajtimin e rasteve të shkeljeve të përsëritura të Kodit të Gazetarëve të Maqedonisë. Në këto raste, Këshilli i Nderit do të mund të shqiptojë vërejtje publike ose të propozojë përjashtimin nga anëtarësia në SHGM, në përputhje me kushtet e përcaktuara në Rregullore dhe kompetencat e Bordit Drejtues.

Ndryshimet pasqyrojnë edhe zhvillimet në mjedisin bashkëkohor mediatik, ndaj Këshilli do të mund të shqyrtojë edhe përmbajtje gazetareske të publikuara në platforma digjitale dhe rrjete sociale, kur ato kanë karakter të produktit gazetaresk dhe lidhen me zbatimin e Kodit të Gazetarëve të Maqedonisë.

Me miratimin e këtyre ndryshimeve, SHGM vazhdon të avancojë mekanizmat e vetërregullimit profesional dhe të forcojë sistemin për mbrojtjen e standardeve profesionale dhe etike në gazetari.

Teksti i ri i kësaj Rregulloreje është i disponueshëm në këtë link

Këshilli i Nderit është organi vetërregullues i gazetarëve në Maqedoni. Detyra e tij kryesore është të kujdeset për promovimin dhe zbatimin e parimeve etike, kritereve dhe standardeve të gazetarisë profesionale dhe të përgjegjshme, të përcaktuara në Kodin e Gazetarëve të Maqedonisë.