Kryetari i ShGM-së u takua me ambasadorin e Britanisë

Përfaqësues të Shoqatës të gazetarëve të Maqedonisë sot u takuan me ambasadorin e Britanisë në Maqedoni, ekselenca e tij Çarlls Garet. Në këtë takim kryetari i ShGM-së Naser Selmani dhe ambasadori Garet biseduan për përmasat që duhet t’i ndërmerr qeveria e re që të përmirësojë gjendjen e lirisë së mediave.

Selmani tha se qeveria e re duhet të gjejë mënyrë që të parandalojë dhunën ndaj gazetarëve e cila eskaloi në tre vitet e fundit. Policia, prokuroria dhe gjykata duhet t’i dënojnë sulmuesit dhe të dërgojnë porosi të qartë për opinionin që në të ardhmën, ky lloj i sjelljes, nuk do të tolerohet më. Është dëshpruese që edhe pas ndërrimit të qeverisë këto sulme vazhdojnë, theksoi Selmani.

Sipas tij, qeveria duhet të ndalojë me shpenzimin e parave publike në mediat sepse me atë krijon relacione jo të shëndosha dhe e prish tregun mediatik.

U konstatua edhe nevoja për reforma në Radio televizionin e Maqedonisë, i cili duhet të jetë servis i qytetarëve, e jo mjet për propagandë në duart e partive në pushtet.

Selmani u zotua edhe për ngritjen e transparencës të qeverisë, e cila në të ardhme duhet të organizojë brifingje të rregullta për gazetarët, ku ato do të mund të marrin më shumë informata për punën e institucioneve.

“Transparenca më e madhe do të thotë më pak spekulime në mediat”, tha ai dhe tregoi shembullin e Gjermanisë, ku një herë në javë zëdhënësit e të gjitha ministrive mbajnë pres konferencë të përbashkët në të cilën ato iu përgjigjen pyetjeve të gazetarëve.

U përshëndet përmirësimi i praktikës gjyqësore lidhur me paditë për shpifje ndaj gazetarëve, por u theksua që ka nevojë të punohet në përmirësimin e komunikimit dhe bashkëpunimit mes gazetarëve dhe gjykatësve.

Përfaqësuesit e ShGM-së dhe ambasadori Garet u pajtuan që duhet të shfrytëzohet momenti për reforma të vërteta në mediat me qëllim që të garantohet liria e fjalës dhe përmirësimi i cilësisë së gazetarisë.