Kontributi i shoqërisë civile për integrimin e Ballkanit në BE

Të hënën dhe të martën në Sarajevë u mbajtë Forumi i gjashtë i shoqërisë civile të Ballkanit Perëndimor, i organizuar nga Komiteti ekonomik e social evropian, në të cilin u diskutua për sfidat më të mëdha me të cilët ballafaqohen shtetet ballkanike në rrugën e integrimit, siç është liria e fjalës, eurointegrimet, roli i partnerëve social dhe shoqërisë civile në promovimin e zhvillimit të qëndrueshëm dhe punësimit, si dhe për migrimin dhe të drejtat e grave.

Në Forumin ishte i pranishëm edhe kryetari i Shoqatës së gazetarëve të Maqedonisë, Naser Selmani, i cili në panelin për lirinë e fjalës foli për rolin e sektorit joqeveritar në promovimin e lirisë së mediave dhe për mënyrën e zgjidhjes së problemeve më të vështira.

Selmani tha se organizatat joqeveritare duhet të ngritin vetëdijen e qytetarëve për lirinë e fjalës, e cila është e drejtë themelore e garantuar me ligjet e vendit dhe me konventat ndërkombëtare. “Qytetarët duhet të kuptojnë se kanë të drejtë t’i shprehin mendimet e tyre lirshëm, pa ndërhyrjen e pushtetit, por gjatë asaj duhet respektuar edhe të drejtat e qytetarëve të tjerë”, tha Selmani dhe shtoi se organizatat joqeveritare duhet t’i dënojnë dhe dokumentojnë të gjitha rastet e shkeljes së lirisë së fjalës.

Sipas tij, arsyet kryesore për mosrespektimin e lirisë së fjalës në shtetet e Ballkanit Perëndimor janë mungesa e traditës demokratike, dështimi për të ndërtuar elita politike të përgjegjshme, të cilët besojnë në vlerat demokratike dhe mbajnë llogari për interesat e shteteve dhe qytetarëve të tyre.

“Sistemet politike në Ballkan nuk janë demokratike, por janë demokraci hibride. Unë ato i quaj demokraci sovjetike, të cilët si model e kanë Rusinë dhe Putinin”, tha Selmani dhe shtoi se komunizmi është rrënuar, por praktikat autoritare të qeverisjes kanë mbetur.

Duke folur për zgjidhjen e problemeve të lirisë së fjalës në shtetet e Ballkanit, Selmani tha që autoritetet duhet publikisht të dënojnë dhunën mbi gazetarët dhe t’i përmbushin obligimet e tyre ligjore dhe t’i dënojnë fajtorët. Ai kërkoi që pushteti të pushojë të finansojë mediat private sepse me atë hapet mundësia që qeveritë t’i kontrollojnë mediat.

Ai gjithashtu propozoi që serviset radiodifuzive publike të forcohen, të inkurajohen gjykatësit dhe prokurorët të ybatojnë praktikën e Gjykatës evropiane për të drejtat e njeriut dhe kërkoi rritjen e transparencës së institucioneve dhe forcimin e vetë-rregullimit në media.

Në fund të Forumit u miratua edhe një deklaratë, me të cilën edhe një herë u riafirmuan parimet themelore demokratike, siç janë respektimi i të drejtave dhe lirive themelore të njeriut dhe sundimi i të drejtës. Deklaratën e plotë mund ta gjeni në këtë faqe: http://www.eesc.europa.eu/?i=portal.en.events-and-activities-6th-western-balkans–declaration