Kolegu Ademi është penguar sërish në kryerjen e punës së tij, MPB duhet urgjentisht të hetojë rastin
Shoqata e Gazetarëve të Maqedonisë (SHGM) reagon për pengesat e sotme ndaj kolegut Nevrij Ademi nga mediumi Tetova Sot gjatë kryerjes së punës së tij profesionale, të cilit një person i panjohur i kishte grabitur pajisjet dhe e kishte larguar me dhunë nga objekti i një shkolle të mesme në Tetovë.
Sipas deklaratave të kolegut Ademi, sot në ambientet e shkollës së mesme “7 Marsi” në Tetovë, derisa ishte në pritje për të regjistruar një kronikë me drejtorin e kësaj shkolle, një person i panjohur ia ka marrë celularin dhe ia ka shtyrë mikrofonin. Menjëherë pas kësaj, i njëjti person, duke përdorur një gjuhë të vrazhdë, ka tentuar ta shtyjë gazetarin jashtë në oborrin e shkollës.
“Nga zyra e drejtorit të shkollës doli një burrë i cili më tha se drejtori nuk ishte në punë dhe se ishte shumë i zënë me detyrat e veta. Unë iu përgjigja se pavarësisht do ta pres këtu, dhe në atë moment burri më kapi për dore për të më përzënë jashtë, ndërsa unë i thashë të mos më prekte. Ai vazhdoi të më përzinte nga shkolla dhe më mori telefonin dhe mikrofonin nga dora”, tha Ademi.
Rasti është paraqitur në Ministrinë e Punëve të Brendshme, ndërsa Shoqata e Gazetarëve të Maqedonisë do të ndjekë hetimet dhe do të insistojë të ketë përgjegjësi nga ana e personit që e ka penguar gazetarin Ademi në kryerjen e punës së tij profesionale. Ky është incidenti i dytë që ndodhi këtë vit me gazetarin Nevrij Ademi, ai në incidentin e parë është ndjekur nga një person me sëpatë nga vendi ku ai po filmonte një reportazh, për të cilin sulmuesi është ndjekur penalisht dhe më pas u dënua.
