Ka ndërruar jetë kolegu Isuf Kadriu

SHGM shpreh keqardhje të thellë për humbjen e gazetarit Isuf Kadriu dhe shpreh ngushëllime familjes dhe miqve të tij.

Isuf Kadriu ka ndërruar jetë në moshën 52 vjeçare nga një sulm në zemër.

Karriera e kolegut Kadriu filloi në vitin 1998 në televizionin ERA, ndërsa nga viti 1999 në programin në gjuhën shqipe të televizionit të Maqedonisë, punoi si redaktor i lajmeve deri në vitin 2008, duke përfshirë edhe periudhën e ndjeshme të konfliktit të vitit 2001, ku me përkushtim nuk kurseu asgjë nga pikëpamja profesionale, kontribuoi në informimin e drejtë dhe objektiv të ngjarjeve në terren dhe shpeshherë edhe vetë ishte në rolin e një reporteri ushtarak nga fronti.

Prej vitit 2008 ka qenë zv/kryeredaktor i televizionit ALSAT, ku ka dhënë një kontribut të jashtëzakonshëm në procesin e organizimit dhe menaxhimit të punës në programin informativ të televizionit. Kolegu Isuf Kadriu la gjurmë dhe shembull se si duhet ushtruar profesioni si në televizionin ALSAT, ashtu edhe te gazetarët në përgjithësi, me profesionalizmin dhe përkushtimin e tij.

Që nga viti 2001, Kadriu ishte korrespondent i përhershëm i Radios Evropa e Lirë nga Shkupi, nga ku raportonte për zhvillimet politike, ekonomike, kulturore dhe ngjarjet nga Shkupi dhe vendi.

Isuf Kadriu me vite ka kontribuar aktivisht në punën e SHGM-së si anëtar aktiv dhe ka qenë edhe anëtar i Bordit të parë Drejtues të Këshillit për Etikë në Media të Maqedonisë me propozim të SHGM-së.

Foto: ALSAT