Interes i lartë për regjistrin e online medieve profesionale të SHGM në Konferencën për media të Këshillit të Evropës në Ljubljanë

Regjistri i online medieve profesionale që do të promovohet këtë muaj nga Shoqata e Gazetarëve të Maqedonisë dhe Këshilli për Etikë në Mediat në Maqedoni zgjoi interes të madh dhe mbështetje nga gazetarët dhe profesionistët e medieve që morën pjesë në konferencën e Këshillit të Evropës “Thirrja e fundit për gazetari cilësore” që u mbajt më 28 dhe 29 nëntor në Ljubljanë.

Në konferencën e organizuar nga Ministria e Kulturës e Republikës së Sllovenisë, morën pjesë rreth 150 gazetarë, ekspertë të medieve, anëtarë të shoqatave gazetareske, organeve rregullatore dhe vetë-rregulluese nga 40 shtete anëtare të organizatës më të vjetër evropiane, ndër të cilët ishte edhe një përfaqësues i SHGM-së.

Shkrim-leximi mediatik, inteligjenca artificiale dhe aplikimi i saj në mediat, praktikat rregullatore dhe vetë-rregulluese në sferën e medias në vendet evropiane, u diskutuan në konferencën në frymën e domosdoshmërisë së gazetarisë cilësore, e cila është përgjigja e vetme kundër lajmeve të rreme, keqinformimit, propagandës, gjuhës së urrejtjes dhe manipulimit politik, të cilët pak a shumë janë të pranishëm në mediat në tërë Evropën, veçanërisht në sferën online.

Sipas pjesëmarrësve të konferencës, gazetaria cilësore është e rrezikuar jo vetëm në vendet e Evropës Lindore, ku tendencat autoritare janë pjesë e trashëgimisë historike, por edhe në vendet e vjetra anëtare të BE-së, dhe madje edhe në djepin e demokracisë në Britaninë e Madhe, ku nën ndikimin e populizmit në rritje ka një rënie të standardeve profesionale të gazetarisë.

Regjistri i online medieve profesionale i përgatitur nga SHGM dhe KEMM me mbështetjen e Odës Ekonomike në Maqedoni u theksua si një shembull i rrallë i mekanizmit vetë-rregullues që duhet të ndiqet dhe zbatohet në vendet e tjera evropiane për të ndihmuar gazetarinë profesionale dhe cilësore.

Përfaqësuesit e Këshillit të Evropës në konferencën gjithashtu shprehën interes për konceptin e mbështetjes financiare për mediat e shkruara nga buxheti i shtetit, që është duke u praktikuar në Maqedoni për vitin e dytë me iniciativën e SHGM-së, dhe Radio Ljubljana incizoi një emision të veçantë për konferencën, ku përfaqësuesi ynë foli për mediat në vend, si dhe për praktikat dhe iniciativat e SHGM-së.