Institucionet duhet të jenë më transparente dhe më të përgjegjshme

Shoqata e gazetarëve të Maqedonisë në bashkëpunim me OnLimit Media sot organizuan debatin në temë: “Sfidat e Qeverisë dhe Institucioneve në Rritjen e Transparencës para Mediave dhe Qytetarëve”. Në debatin morën pjesë ministri për transparencë dhe llogaridhënie Robert Popovski, kryetari i Shoqatës së Gazetarëve të Maqedonisë Naser Selmani, si dhe gazetarja hulumtuese Sashka Cvetkovska.

Selmani tha se është mirë që Qeveria është deklaruar të jetë transparente dhe ka ndërmarr masa konkrete me qëllim që gazetarët të kenë më shumë informata. Ai tha se mosrespektimi i të drejtës të gazetarëve për qasje të lirë në informata është shkelje e lirisë së të shprehurit. “Për deri sa nuk ka përgjegjësi politike, por edhe sanksione për këto funksionarë të cilët nuk japin informata, që janë të kërkuara nga ana e gazetarëve, nuk mund të llogaritet se kemi demokraci serioze”, theksoi Selmani.

Në fjalimin e tij Popovski theksoi se Qeveria është tërësisht e përkushtuar për transparencë ndaj opinionit dhe mediave. “Transparenca dhe hapja ndaj opinionit do të thotë qeverisje e përgjegjshme. Kjo dhe shumë debate të tilla janë aktivitete në drejtim të mirë për atë si mund ta ndryshojmë së bashku kulturën e sjelljes politike në shoqëri, ndërsa ne jemi të përkushtuar ta bëjmë atë”, tha ai.

Në debatin foli edhe gazetarja Sashka Cvetkovska, e cila e lavdëroi Qeverinë se ka ndryshuar qasjen ndaj gazetarëve dhe mediave, mirëpo theksoi se disa ministra dhe funksionarë nuk përgjigjen shpejtë në kërkesat për informata. Sipas saj, problemi që vazhdon është përgjegjësia ose mos përgjegjësia e institucioneve dhe të funksionarëve publik kur ka ndonjë informatë publike, kur ajo publikohet në media dhe do të jetë e dukshme se bëhet fjalë për keqpërdorim të pozitës zyrtare dhe shkelje e ligjeve të caktuara, ndërsa institucionet nuk reagojnë.