Iniciativa për një Kod të ri Etik: Hapërim drejt standardeve moderne mediatike
Një Kod i ri Etik për gazetarët, i cili do të përputhet me nevojat dhe sfidat moderne me të cilat po përballet sektori i medias, ishte një nga temat kryesore të diskutimit në takimin e parë konsultativ të mbajtur më 9 nëntor 2024 në Sveti Nikole, me pjesëmarrjen e mbi 20 përfaqësuesve të mediave lokale rajonale, si dhe korrespondentëve nga rajoni i Shtipit.
Gazetarët ndanë mendimet dhe përvojat e tyre dhe dhanë një kontribut të vlefshëm në këtë iniciativë, që ka për qëllim bashkimin e mendimeve dhe rekomandimeve nga gazetarët e gjithë vendit.
Kryetari i Shoqatës së Gazetarëve të Maqedonisë (SHGM), Mlladen Çadikovski, theksoi se zëri i punonjësve të mediave është thelbësor për krijimin e politikave që do të mbrojnë të drejtat e gazetarëve dhe do të forcojnë profesionalizmin në punën e tyre. “Jemi të vetëdijshëm që çështjet socio-ekonomike janë gjithmonë në interes të gazetarëve, në një proces paralel me përmirësimin e vazhdueshëm të standarteve etike,” deklaroi Çadikovski, duke theksuar nevojën për komunikim të drejtpërdrejtë me gazetarët lokalë.
Koordinatori rajonal për rajonin e Shtipit, Toni Mihaillov, u fokusua në nevojën për mbështetje të mediave lokale dhe rëndësinë e këtyre diskutimeve për gjetjen e zgjidhjeve të qëndrueshme. “Duhet të hapet një bisedë për të shmangur një situatë në të cilën interesi publik për çështjet lokale do të injorohet,” theksoi Mihaillov.
Mirçe Adamçevski, anëtar i grupit të punës për ndryshimin e Kodit Etik, theksoi rëndësinë e Kodit të tanishëm, i cili, megjithëse është miratuar në vitin 2001, është ende i aplikueshëm. “Përpjekjet e SHGM, KEMM dhe IMM për organizimin e këtyre konsultimeve janë shumë të rëndësishme,” shtoi Adamçevski, duke shprehur mirënjohjen për mbështetjen nga komuniteti gazetaresk.
Ognen Janeski theksoi kompleksitetin e detyrës për krijimin e një kodi të ri Etik në kushte të zhvillimit të shpejtë teknologjik. “Sfida e sotme, duke përfshirë inteligjencën artificiale dhe përparimin teknologjik, është një faktor i rëndësishëm për profesionin gazetaresk,” theksoi Janeski.
Grupi i punës për ndryshimin e Kodit Etik ka për qëllim të udhëheqë procesin e modernizimit të standarteve etike gazetareske në Maqedoni. Kjo iniciativë, e realizuar në bashkëpunim me Këshillin për Etikë në Media të Maqedonisë (KEMM) dhe Institutin Maqedonas për Media (IMM), do të kontribuojë në përmirësimin e etikës profesionale dhe përgjegjësisë së mediave.
Ky aktivitet është pjesë e projektit për edukimi mediatik “Të rinjtë mendojnë”, i mbështetur nga USAID dhe IREX.
