Iniciativa për bashkëpunim me Odën për Sigurim Privat në temë – Siguri më e madhe e punëtorëve mediatik
Shkëmbimi i përvojave të mëparshme nga terreni ndërmjet punëtorëve të mediave dhe të punësuarve në agjencitë private për sigurim, mundësitë për përmirësimin e bashkëpunimit dhe rritjen e mirëkuptimit të ndërsjellë, sendërtimin e planeve strategjike të dyja organizatave, nënshkrimi i një memorandumi të përbashkët për bashkëpunim, ishin disa nga temat për të cilat u diskutua në takimin e zhvilluar mes Shoqatës së Gazetarëve të Maqedonisë (SHGM) dhe Odës për Sigurim Privat të Republikës së Maqedonisë së Veriut.
Iniciativa e SHGM-së për realizimin e takimit u përshëndet nga ana e kryetares së Odës ndërsa njëkohësisht u theksuan nevojat dhe sfidat me të cilat përballen agjencitë për sigurim gjatë kryerjes së detyrave të tyre ku përfshihen mediat, gatishmërinë dhe hapjen e tyre për bashkëpunim si dhe përmirësimin e komunikimit me gazetarët dhe punonjësit e mediave.
Përfaqësuesit e SHGM-së ndanë përvojat e tyre në raste kur kishte pakënaqësi nga ana e anëtarëve të SHGM-së gjatë punës në terren dhe kontakteve të drejtpërdrejta me punëtorët e agjencive për sigurim dhe shprehën nevojën që të dyja palët të gjejnë një pikë të përbashkët të mirëkuptimit që në të ardhmen do të ndihmojë në lehtësimin e procesit të bashkëpunimit. Krahas temave të lartpërmendura u bisedua edhe për aktivitetet e ardhshme si, realizimi i trajnimeve dhe fushatave të përbashkëta që do të ngritin vetëdijen për rëndësinë që sjell puna e të dyja palëve dhe do të kontribuonin në realizimin e qëllimit përfundimtar i cili është përmirësimi i komunikimit të ndërsjellë.
Në fund palët u dakorduan që të organizohet një takim pune në një rreth më të gjerë me përfaqësues të menaxhmentit të agjencive më të mëdha për sigurim privat dhe përfaqësuesve të SHGM-së, ku do të diskutohet për masat specifike që synojnë përmirësimin e bashkëpunimit ndërmjet sektorit të mediave dhe sektorit të sigurimit privat, me qëllim që punëtorët e mediave të zhvillojnë punë të papenguar.
Të pranishëm nga Oda ishin kryetarja Verica Mileska Stefanovska, sekretarja e përgjithshme Sanja Kermetçieva derisa nga SHGM morën pjesë kryetari i SHGM-së Mlladen Çadikovski, drejtori i SHGM-së Dragan Sekullovski, zyrtarja për komunikim Biljana Nasteska-Kallanoska, koordinatori i Seksionit të kameramanëve Risto Mishev dhe anëtari i Këshillit Drejtues të SHGM-së Asllan Vishko.
