SHGM: Hetimi i Prokurorisë Publike për reklamat zgjedhore duhet të jetë transparent dhe jo-selektiv
Shoqata e Gazetarëve të Maqedonisë (SHGM) beson se hetimi mbi reklamimin e paguar politik duhet të jetë transparent, efektiv dhe me qasje jo-selektive.
Prokuroria Themelore Publike informoi se është hapur një hetim për reklamimin politik të paguar nga zgjedhjet e fundit në disa prej online mediave që janë paraqitur në Komisionin Shtetëror të Zgjedhjeve në zgjedhjet e fundit. Sipas Prokurorisë Publike dhe raportimin e mediave në lidhje me këtë rast, për momentin është duke u kontrolluar dokumentacioni në tre firma nëse tek ato është tejkaluar kufiri ligjor prej 15 mijë eurosh për reklamim në gjithsej nëntë portale ku është reklamuar partia politike OBRM-PDUKM.
Kërkojmë nga Prokuroria Publike që të ketë qasje të kujdesshme gjatë hetimit në mënyrë që të mos krijojë përshtypjen e publikut se hetimi është selektiv vetëm për një parti politike, sepse në regjistrin e KSHZ-së janë regjistruar 235 online media me politika të ndryshme editoriale dhe pothuajse gjysma e tyre nuk përmbajnë informata transparente për pronësinë e tyre. Përveç kësaj, hetimi duhet të jetë transparent dhe i paanshëm për të shmangur perceptimin se me veprime të tilla autoritetet e zbatimit të ligjit duan të frikësojnë online mediat profesionale.
Përkujtojmë se para miratimit të Kodit Zgjedhor, SHGM insistonte për tu hequr praktika e propagandës politike të paguar në media ose për sqarim dhe specifikim të kritereve për atë se cilat online media mund të aplikojnë në KSHZ për program politik të paguar.
Në vend që të pranonin rekomandimet tona, partitë politike me konsensus ulën edhe më shumë kriteret për atë se cilat media mund të aplikojnë për të marrë pjesë nga kulaçi reklamuese i partive. Pothuajse gjysma e mediave që u paraqitën në KSHZ nuk kishin impresum, dhe disa madje nuk kishin informata themelore lidhur me pronësinë.
Për këtë rrezik nga korrupsioni, i cili është i lejuar me Ligjin Zgjedhor, SHGM disa herë ka paralajmëruar se kjo paraqet një rrezik i shpërlarjes së parave nga partitë politike përmes mediave fiktive.
