Hetim urgjent për sulmin ndaj Bozhinovskit

Shoqata e Gazetarëve të Maqedonisë (SHGM) dhe Këshilli për Etikë në Mediat në Maqedoni (KEMM) kërkojnë reagim të menjëhershëm nga Ministria e Punëve të Brendshme për hetim të shpejtë dhe efikas në interes të gjetjes dhe sanksionimit të sulmuesit ndaj pronarit të portalit “Burevesnik”, Zoran Bozhinovski.

Sipas raportimeve të mediave, sulmi ka ndodhur mbrëmjen e djeshme në Manastir, para shtëpisë së tij dhe është lënduar rëndë nga dy persona të maskuar. Rasti tashmë është denoncuar në polici. Ne dënojmë çdo formë të dhunës fizike dhe theksojmë se sulmi fizik është vepër penale.

I bëjmë apel Ministrisë së Punëve të Brendshme dhe Prokurorisë Publike që urgjentisht të hetojnë dhe ndjekin penalisht sulme të tilla për të dënuar ata që shkelin ligjin, por edhe për të parandaluar krime të tilla të mundshme në të ardhmen.