Gjykata refuzoi padinë e Apasiev kundër gazetarëve
Në Gjykatën Themelore Penale në Shkup sot është shpallur aktgjykimi me të cilin lirohen nga akuza gazetarët Meri Jordanovska dhe Predrag Petroviq nga “A1on”. Ky aktgjykim vjen pas padisë private nga deputeti dhe lideri i partisë politike “E majta” Dimitar Apasiev, i cili i paditi gazetarët për “publikim të paautorizuar të të dhënave personale” sipas nenit 148 nga Kodi Penal.
Gjatë procedurës gjyqësore që zgjati për gati një vit, paditësi nuk është paraqitur personalisht as një herë në gjykatë ndërsa gazetarët kanë qenë disa herë të pranishëm në seancat në gjykatën ku kanë përfaqësuar mbrojtjen e tyre. Pas shpalljes së aktgjykimit, kolegia Meri Jordanovska tha: “Zyrtarët shtetërorë duhet të kuptojnë se ata mbajnë postin 24/7 dhe janë më të ekspozuar ndaj kritikave publike, qofshin ato në postë elektronike, mesazhe, në telefon privat ose në telefon të punës. Dhe kur ne si gazetarë i kërkojmë, i kërkojmë në emër të publikut, për gjëra që janë me interes publik, prandaj nuk guxon të vendoset praktika e futjes së frikës dhe censurës”.
Ky aktgjykim konfirmon qëndrimin e gazetarëve se nuk bëhet fjalë për publikimin e shënimeve personale, por për informacione që janë me interes publik dhe se pyetjet gazetareske drejtuar Apasievit, në këtë rast, janë legjitime dhe meritojnë vëmendjen e publikut.
Mbrojtja e gazetarëve nënvizon praktikën gjyqësore të Gjykatës Evropiane për të Drejtat e Njeriut (GJEDNJ) sipas së cilës kufijtë e kritikës publike janë më të gjera për bartësit e funksioneve publike sesa për personat privat dhe ata duhet të kenë një prag më të lartë të kritikës. Padi të tilla në kontekstin e Këshillit të Evropës njihen si padi për parandalimin strategjik të pjesëmarrjes publike (SLAPP). Këto lloj padish shërbejnë për të frikësuar dhe për të shkaktuar shpenzime ligjore ose thjesht për të lodhur të pandehurit, në këtë rast gazetarët kritikë, me qëllim që të demotivohen ose të heqin dorë nga kritika publike. Këto padi, veçanërisht kur iniciohen nga politikanë dhe bartës të funksioneve publike, mund të provokojnë autocensurë te gazetarët dhe në këtë mënyrë të cenojnë të drejtën e qytetarëve për informim.
