Gazetaria në gjykatë: Sjellje përçmuese ndaj publikut

Shoqata e Gazetarëve të Maqedonisë (SHGM) me përfaqësuesit e saj dhe ekipin ligjor sot mori pjesë në gjykimin e përsëritur në të cilin ish-zëvendëskryeministri Koço Angjushev padit Sashka Cvetkovskën dhe Investigative Reporting Lab (IRL).

Ju kujtojmë se padi të tilla si kjo kundër IRL-së në kuadër të Këshillit të Evropës njihen si padi strategjike për parandalimin e pjesëmarrjes publike (SLAPP). Këto lloj padish shërbejnë për të shkaktuar frikësime dhe kosto ligjore ose thjesht lodhin palën, në këtë rast gazetarët kritikë, për t’i demotivuar ose për të hequr dorë nga kritika publike. Këto procese gjyqësore, sidomos kur iniciohen nga njerëz të fuqishëm ekonomikisht, politikanë dhe bartës të posteve publike, mund të shkaktojnë autocensurë te gazetarët dhe në këtë mënyrë të cenojnë të drejtën e informimit të qytetarëve.

Seanca e parë e sotme është rezultat i vendimit të Gjykatës së Apelit në Shkup kundër kolegëve të Investigative Reporting Lab (IRL), në dëm të gazetarisë së lirë, të anulohet aktgjykimi i Gjykatës Themelore dhe të kthehet në rigjykim lënda në të cilën ish-zëvendëskryeministri Koço Angjushev ka paditur Sashka Cvetkovskën dhe IRL-në.

SHGM-ja reagon ashpër ndaj qëndrimit tejet përçmues të avokatit të z. Angjushev ndaj të pranishmëve në sallën e gjyqit, por edhe qëndrimit ndaj gjykatës që mund të cilësohet si presion ndaj opinionit.

Duam vetëm të kujtojmë se Gjykata Civile e hodhi poshtë padinë për shpifje të Koço Angjushevit, por Gjykata e Apelit me një vendim të turpshëm konstatoi se gjykata më e ulët nuk i ka vlerësuar provat me ndërgjegje dhe kujdes, nuk ka marrë parasysh më shumë prova dhe dëshmi kundër Cvetkovskës dhe gabimisht dhe në mënyrë jo të plotë ka konstatuar gjendjen faktike.

SHGM-ja, si një organizatë esnafi e cila ofron ndihmë ligjore falas për gazetarët dhe punonjësit e medias në vend, por edhe si anëtare e Federatës Evropiane të Gazetarëve – EFJ, ka një praktikë të ndjekjes, monitorimit dhe raportimit të proceseve që përfshijnë gazetarë dhe punonjës të medias.