Gazetarët nga Manastiri dhe Prilepi debatuan për standardet e reja etike në profesionin e gazetarisë
Shoqata e Gazetarëve të Maqedonisë (SHGM) më 17 mars 2026 në Manastir mbajti një takim konsultativ me gazetarë dhe redaktorë nga qendra rajonale, në kuadër të procesit për finalizimin e tekstit të ri të Kodit të Gazetarëve.
Takimin e hapi Zhaneta Zdravkovska, koordinatore e qendrës rajonale në Manastir, e cila u ndal te sfidat kryesore me të cilat përballet gazetaria lokale. U theksua paqëndrueshmëria financiare, numri i reduktuar i mediave lokale, si dhe ndikimi gjithnjë e më i madh i burimeve digjitale joformale që nuk respektojnë standardet etike. Gjithashtu, u theksuan kapacitetet e kufizuara të redaksive dhe vështirësitë në qasjen në informata nga institucionet.
Dragan Sekulovski, drejtori ekzekutiv i SHGM-së, foli për nevojën e rishikimit të Kodit, duke marrë parasysh kushtet e ndryshuara të punës dhe trendet e reja mediatike që nuk janë përfshirë në versionet e mëparshme. Po ashtu, ai bëri një përmbledhje të gjendjes së sigurisë së gazetarëve dhe aktiviteteve aktuale të SHGM-së.
Në kuadër të projektit për rishikimin e Kodit, u prezantuan aktivitetet e deritanishme si dhe hapat e ardhshëm në proces, me theks në gjithëpërfshirjen dhe përfshirjen e komunitetit të gazetarëve në krijimin e tekstit final.
Sefer Tahiri, përfaqësues i grupit punues për ndryshimin e Kodit Etik të gazetarëve, prezantoi ndryshimet e deritanishme dhe futjen e neneve të reja që lidhen me inteligjencën artificiale dhe mbledhjen e fshehtë të të dhënave në raste kur informacioni nuk mund të sigurohet ndryshe dhe ekziston interes i lartë publik.
Në diskutim, gazetarët nga qendra rajonale e Manastirit dhanë propozime konkrete për përmirësimin e tekstit të Kodit. Ndër to ishin iniciativat për sjelljen profesionale të gazetarëve në rrjetet sociale, saktësimin e gjuhës në raport me barazinë gjinore, si dhe plotësimin e dispozitave për përdorimin etik të fotografive, materialeve audio dhe video. Po ashtu, u shpreh mbështetje e përbashkët për rikthimin e disa neneve që lidhen me kulturën e të folurit dhe ruajtjen e dinjitetit dhe reputacionit të profesionit.
Pjesëmarrësit u pajtuan se është e nevojshme forcimi i mëtejshëm i kapaciteteve të redaksive lokale përmes trajnimeve praktike, veçanërisht në fushën e aftësive digjitale, me qëllim përmirësimin e cilësisë dhe profesionalizmit në gazetari.
Procesi i rishikimit të Kodit ekzistues do të vazhdojë edhe në periudhën e ardhshme me konsultime shtesë, ndërsa propozimi final do të jetë rezultat i një procesi të gjerë dhe gjithëpërfshirës me pjesëmarrjen e komunitetit të gazetarëve.
Grupi punues i përbërë nga përfaqësues të Shoqatës së Gazetarëve të Maqedonisë, Institutit Maqedonas për Media dhe Këshillit për Etikë në Media filloi aktivitetet për hartimin e kodit të ri në korrik 2024, ndërsa kodi i ri pritet të promovohet në gjysmën e dytë të vitit 2026.
Përmbajtja e këtij publikimi është përgjegjësi e vetme e Shoqatës së Gazetarëve të Maqedonisë dhe në asnjë mënyrë nuk mund të konsiderohet se pasqyron qëndrimet e Qeverisë së Zvicrës, Civica Mobilitas apo organizatave që e zbatojnë.
