Gazetarët kërkojnë lirimin nga arresti të Bozhinovskit

Sot kemi ardhur para Gjykatës së Shkupit të shprehim solidaritetin tonë me gazetarin Zoran Bozhinovskin, i cili tashmë tre vjet i është nënshtruar përndjekjes penale  për shkak të punës së tij si gazetarë.

Përkujtojmë gjykatësit se Maqedonia është vend i dytë në Europë ku gazetarët arrestohen. Njëherë u dënua Tomisllav Kezharovski, tani Bozhinovski, publikisht pyesim kush do jetë i akuzuari i radhës. Në një vend ku gazetarët arrestohen, atje është burgosur edhe liria e fjalës dhe liria e mediave. Këto procese gjyqëasore kanë për qëllim të ndëshkojnë gazetarët e padëgjueshëm dhe të disciplinojnë dhe frikësojnë të tjerët.

Nuk jemi këtu për të bërë trysni mbi gjykatën dhe t’u themi se çfarë vendimesh duhet të marrin. Këtu jemi për të ngritur zërin kundër padrejtësisë.

Bozhinovski ende pa u gjykuar kaloi dy vite në burg, prej të cilave më shumë se një vit në paraburgim në Serbi dhe katër muaj në Maqedoni. Gjykatësit që refuzojnë të shqiptojnë masën e arrestit për politikanë të dyshuar për rrënimin e rendit demokratik të vendit, ndërsa lehtë arrestojnë gazetarë, nuk kanë të drejtë të fshihen pas kinse pavarësisë së gjykatave.

Kërkojmë Bozhinovski mënjëherë të litohet nga paraburgimi dhe t’i mundësohet sikurse edhe ish funksionarëve të dyshuar të mbrohet në liri. Nëse nuk ka rrezik politikanët e dyshuar për krime të rënda ta braktisin vendin, atëherë edhe më e vogël është mundësia që një gazetarë të shmangë drejtësinë.

Këmbëngulim që rasti i Bozhinovskit t’i dorëzohet Prokurorisë special sepse kompetenca e saj mbi këtë lëndë nuk mund të vihet në dyshim. Çdo refuzim i prokurorisë për ta dorëzuar lëndën, do të thotë të pengosh drejtësinë dhe do të forcohet bindja në opinion se dikush me çdo kusht dëshiron të dënojë një gazetarë me burgim në shenjë hakëmarrje për publikimin e keqpërdorimeve të pushtetit.