Gazetarët dhe avokatët shkëmbyen përvoja mbi paditë SLAPP

Shoqata e Gazetarëve të Maqedonisë dhe Zyra e Këshillit të Evropës organizuan seminar treditor ekspertësh me temë: “Paditë strategjike kundër pjesëmarrjes publike (SLAPP), përvojat krahasuese dhe praktika për njohje dhe parandalim” nga 14 deri më 16 prill në Gjevgjeli.

Në këtë seminar profesional morën pjesë juristë dhe gazetarë të cilët patën mundësinë të diskutojnë dhe të shkëmbejnë përvoja mbi paditë SLAPP ose të njohura si padi strategjike për parandalimin e pjesëmarrjes publike që synojnë të frikësojnë dhe lodhin financiarisht gazetarë(e)t apo mediat e pandehura. Kur iniciohen nga politikanë(e)t dhe bartësi(e)t e funksioneve publike, këto procese gjyqësore mund të shkaktojnë frikë dhe autocensurë tek gazetarë(e)t, duke cenuar kështu të drejtën e qytetarë(e)ve për t’u informuar.

Mlladen Çadikovski, kryetari i SHGM-së, në fjalimin e tij theksoi:

“Është mirë që kemi mundësinë të shohim njëri-tjetrin në një seminar profesional, ku tema kryesore janë paditë me të cilat përballemi shpesh, të shkëmbejmë mendime dhe përvoja që do të na ndihmojnë të ndryshojmë në të ardhmen, të përmirësojmë qasjen kur bëhet fjalë për paditë SLAPP. Këtu, me ne janë ekspertët nga Këshilli i Evropës, të cilët besoj se do të kontribuojnë shumë në adresimin e çështjes për të dyja palët e pjesëmarrësve – gazetarët dhe avokatët”.

Aleksandra Bogdanovska, menaxhere e lartë e projektit, Zyra programore e Këshillit të Evropës në Shkup, theksoi bashkëpunimin me SHGM-në si pjesë e projektit “Liria e shprehjes dhe liria e mediave në Maqedoninë e Veriut (JUFREX 2)”:

“SHGM janë partnerët tanë dhe së bashku synojmë tema dhe qëllime që janë me interes të përbashkët duke aranzhuar paraprakisht dhe duke adresuar problemet dhe nevojat aktuale. Në këtë drejtim është edhe ky seminar profesional, i cili fatkeqësisht është edhe i fundit në kuadër të projektit konkret, por do të theksoj se në të kaluarën kemi pasur bashkëpunim shumë të suksesshëm në tema që janë të ndryshme dhe tema që kanë kontribuar në ndryshimet ligjore, siç janë paditë strategjike kundër pjesëmarrjes së publikut. Do të doja të ju njoftoj se Këshilli i Evropës ka formuar një grup pune që do të merret me këtë çështje, gjegjësisht me miratimin e rekomandimit për SLAPP”.

Në seminar morën pjesë edhe ekspertë nga Këshilli i Evropës, specialiteti i të cilëve është pikërisht ky lloj padish.

Flutura Kusari foli për paditë SLAPP, pse ato u bënë një kërcënim serioz për gazetarinë dhe hulumtimet e disponueshme mbi këtë temë, dhe më vonë u mbajt një diskutim në grupe me temë “Si të reagojmë kur përballemi me SLAPP?”, një seancë që ofroi mundësi për të diskutuar për atë se si të njihet një padi SLAPP, si mund të reagojnë mediat ndaj një padie SLAPP dhe si të kërkohet mbështetje, ndërsa u bisedua edhe për rolin e avokatë(e)ve dhe gjyqtarë(e)ve.

Eksperti i dytë nga Këshilli i Evropës, Aleksandar Kaçamov, prezantoi tre raste të SLAPP nga Evropa, me një diskutim të hapur nga të pranishmit për këtë temë.

Realizimi i këtij lloji të seminareve është i një rëndësie të veçantë për gazetarët, por edhe për avokatët që kanë praktikë të përfaqësimit të gazetarëve në kontestet juridike sepse përvojat e të dyja palëve me paditë SLAPP kontribuojnë për gatishmëri më të madhe për t’u marrë me këtë çështje.

* Kjo ngjarje është e organizuar nga Shoqata e Gazetarëve të Maqedonisë, si partner i projektit “Liria e shprehjes dhe liria e mediave në Maqedoninë e Veriut (JUFREX 2)” në kuadër të aksionit të përbashkët programor të Bashkimit Evropian dhe Këshillit të Evropës “Instrumenti Horizontal për Ballkanin Perëndimor dhe Turqinë 2019 – 2022