Raportimi mbi terrorizmin dhe format e tjera të ekstremizmit të dhunshëm është një sfidë e madhe për mediat në të gjithë botën. Aksesi në informacion është i vështirë, ndërsa gazetarët përballen me presion për të raportuar mbi zhvillimet në kohën e duhur. Prej tyre pritet të raportojnë për interesin publik, duke u kujdesur që të mos shkaktojnë ndonjë dëm shtesë me punën e tyre. Në kuadër të projektit “Ndërtimi i rezistencës kundër terrorizmit dhe ekstremizmit të dhunshëm përmes kapaciteteve të forcuara të gazetarëve, mediave dhe zyrtarëve qeveritarë”, Shoqata e Gazetarëve të Maqedonisë (SHGM), Instituti për Perspektivë Evropiane (IPE) dhe Instituti KONICA në Shkup përpiluan video të shkurtra për promovimin e Protokollit për informim të rasteve që ndërlidhen me terrorizmin dhe ekstremizmin e dhunshëm dhe Udhëzim për raportimin profesional të rasteve të ekstremizmit të dhunshëm dhe terrorizmit.

Protokolli për informim për rastet që lidhen me ekstremizmin e dhunshëm dhe terrorizmin si një mjet i dobishëm do të rrisë rolin e gazetarëve dhe punonjësve mediatik në raportimin e tyre në situata të tilla potenciale në të ardhmen.

Qëllimi i Udhëzimit për raportimin profesional mbi ekstremizmin e dhunshëm dhe terrorizmin është të ofrojë rekomandime për mediat dhe gazetarët në adresimin dhe raportimin e duhur për këto tema. Rekomandimet në të bazohen në parimet etike universale të pavarësisë, ekuilibrit midis lirisë së informimit dhe përgjegjësisë në informim, saktësisë dhe përgjegjësisë në informim. Dhe, kjo, duke u nisur nga fakti që mediat dhe gazetarët janë një faktor i domosdoshëm për kohezionin midis sektorëve të ndryshëm të shoqërisë dhe luajnë një rol jashtëzakonisht të rëndësishëm në parandalimin e ekstremizmit të dhunshëm dhe terrorizmit. Janë prodhuar katër video në maqedonisht, shqip dhe anglisht, ku këtu mund të ndiqni videon e parë.

Videot janë përpiluar në kuadër të projektit “Ndërtimi i rezistencës kundër terrorizmit dhe ekstremizmit të dhunshëm përmes kapaciteteve të forcuara të gazetarëve, mediave dhe zyrtarëve qeveritarë” (Building resilience against violent terrorism and extremism through reinforced journalists, media and government officials), i financuar nga Bashkimi Evropian në kuadër të Programit STRIVE Global Strengthening Resilience to Violent Extremism përmes Hedayah, International Centre of Excellence for Countering Violent Extremism. Përmbajtja e videove është përgjegjësi e vetme e autorëve dhe SHGM, IPE dhe Institutit Konica dhe, në asnjë mënyrë, nuk mund të konsiderohet se i reflekton qëndrimet dhe pikëpamjet e Bashkimit Evropian.