Fushatë e SHGM dhe OSBE për promovimin e standardeve etike dhe profesionale në media
Fushata, e cila është në tri gjuhë, maqedonisht, shqip dhe anglisht, synon të kontribuojë në rritjen e sigurisë së gazetarëve online dhe offline, për zvogëlimin numrit të kërcënimeve dhe sulmeve ndaj gazetarëve dhe punonjësve mediatik në vend.
Po ashtu, ka për qëllim rritjen e ndërgjegjësimit tek opinioni më i gjerë për efektet e dëmshme të sulmeve verbale, siç është gjuha e urrejtjes dhe, natyrisht, ngritja e vetëdijes për sulmet fizike.
Ideja është që përmes videove të rikujtojë publikun që të shmangin fyerjet me bazë gjinore dhe të ilustrojë rëndësinë e rolit të gazetarisë profesionale në një shoqëri demokratike dhe të theksojë aksesin e lirë në informacione, që është thelbësor për publikun.
Videoja e parë e titulluar “Media, liria e fjalës dhe demokracia” flet pikërisht për mënyrën si të arrihet deri tek informacioni i kërkuar.
Videoja e dytë trajton sfidat me të cilat përballen gazetarët në përpjekjen për të informuar publikun, respektivisht në një epokë të digjitalizimit të shtuar dhe fluksit të shpejtë të informacioneve, sfida është që lajmi i vërtetë të “notojë” në sipërfaqen e detit të mbushur me plotë spekulime dhe lajme të pa verifikuara.
Videoja e tretë që flet rreth sigurisë së gazetarëve që është thelbësore për të siguruar akses në informacione.
Fushata është pjesë e projektit “Promovimi i mbrojtjes së gazetarëve dhe standardeve etike dhe profesionale në media” që është realizuar me mbështetjen financiare të Misionit të OSBE-së në Shkup dhe do të jetë aktive në 15 ditët e ardhshme të mediave digjitale në Maqedoninë e Veriut.
Videot janë pa pagesë për t’u shkarkuar dhe publikuar nga mediat në mënyrë që të kontribuojnë më tej në rritjen e ndërgjegjësimit të qytetarëve.
