Forcimi i të drejtës autoriale: Fotoreporterët dhe mediat online në kërkim të zgjidhjeve sistematike

Me iniciativën e përfaqësuesve të seksionit të fotoreporterëve në SHGM, sot u mbajt një takim me përfaqësues të Shoqatës së Mediave Online (Online Media), ku u diskutuan sfidat aktuale që lidhen me të drejtën e autorit dhe modelet e mundshme për përmirësim.

Takimi u thirr duke u nisur nga problemet me të cilat përballen fotoreporterët me shkarkimin e paautorizuar të fotove të tzre autoriale nga disa media të vendit.

Numri i madh i mosmarrëveshjeve të zgjidhura deri më tani jashtë gjykatës, tregon se ka një ndërgjegjësim të shtuar për bashkëpunim nga të dyja palët e interesuara, por mungojnë zgjidhjet sistematike që do të ofrojnë mbrojtje të këtyre të drejtave autoriale, interesim më të madh tek udhëheqësit e mediave dhe natyrisht një përmirësim në cilësinë e përmbajtjes mediatike.

Fotoreporterët shkurtimisht prezantuan një platformë për ndarjen e fotove profesionale që mund të shndërrohet në një burim të rëndësishëm për pasurimin e përmbajtjes mediatike me foto cilësore të autorit.

Përfaqësuesit e Online Medias janë të mendimit se një platformë e tillë, nga përdorimi i së cilës do të përfitonin kryesisht anëtarët e kësaj shoqate, do të ishte një model potencialisht i mirë për përmirësimin e vetërregullimit në promovimin e të drejtës së autorit. Gjithashtu, ata theksuan se Ligji për të Drejtën e Autorit dhe të Drejtat e Përafërta në të ardhmen duhet të përmirësohet për mbrojtje më të madhe jo vetëm të fotoreporterëve por edhe të gazetarëve.

Përfaqësuesit nga zyra ekzekutive e SHGM-së, të cilët ishin edhe të pranishëm në takim, në të ardhmen do të konsiderojnë partnerë të mundshëm për zhvillimin dhe promovimin e një platforme për ndarjen e fotografive profesionale dhe të autorit.

Lidhur me të drejtën e autorit, Shoqata e Gazetarëve publikoi në janar të këtij viti një analizë, Raport Metadata për vitin 2023.