Fillon debati publik për krijimin e Fondit për produkte gazetareske: SHGM dhe organizatat gazetareske evropiane në takim në Qeveri
Me kërkesë të Shoqatës së Gazetarëve të Maqedonisë (SHGM) , sot është mbajtur takim me kryeministrin Dimitar Kovaçevski së bashku me përfaqësues të pesë organizatave botërore gazetareske dhe mediatike që janë në vizitë në Maqedoni.
Temë e bisedës ishte nevoja që Qeveria dhe komuniteti i gazetarëve të gjejnë bashkërisht një mekanizëm përmes të cilit do të promovohet pluralizmi në raportimin mediatik, por edhe përmirësimi i përmbajtjes mediatike në përgjithësi, ku do të mbizotërojë interesi publik dhe jo ai partiak.
Për këtë qëllim, përfaqësuesit e organizatave gazetareske dhe mediatike theksuan domosdoshmërinë e krijimit të një fondi për mbështetjen e pluralizmit në media. Është e rëndësishme të kemi një mekanizëm që do t’u japë mundësi të gjitha mediave dhe gazetarëve që kanë ide për përmbajtje cilësore mediatike, të kenë akses, në mënyrë transparente dhe të drejtë të mbështeten në përpjekjet e tyre për të kënaqur interesin publik.
Kryeministri Kovaçevski përshëndeti përpjekjet e organizatave gazetareske dhe shprehu gatishmërinë për hapjen e debatit publik për kërkesat për krijimin e fondit për mbështetjen e pluralizmit në media në Maqedoni.
Krahas kësaj, në takim u diskutua për marrjen e hapave të mëtejshëm që do të ndikonin në rritjen dhe mbrojtjen e lirisë së shprehjes, masat për mbrojtje më të madhe të gazetarëve nga sulmet verbale dhe fizike, veçanërisht për gazetaret femra që janë më të ekspozuara ndaj sulmeve gjatë ushtrimit të detyrës së tyre.
Për sa i përket transparencës së Qeverisë, u përcollën disa nga pengesat me të cilat përballen punonjësit e medias lokale dhe u kërkua edhe një herë që çdo foto, video dhe tekst nga Qeveria dhe çdo institucion publik të shënohet qartë si përmbajtje qeveritare. Gjithashtu për këtë kërkesë, nga përfaqësues të kabinetit qeveritar, u theksua se ekziston vullneti për të diskutuar për një zgjidhje të mundshme teknike.
Në periudhën prej 5 deri më 7 qershor përfaqësuesit e organizatave gazetareske dhe mediatike po realizojnë takime me Presidentin e Shtetit, Kryeministrin, Kryetarin e Kuvendit, Ministrin Shoqërisë Informatike dhe Administratës, drejtorët e Agjencisë për Shërbime Mediatike Audio dhe Audiovizuele dhe të Servisit Publik (RTM), me ambasadorin e Delegacionit të Bashkimit Evropian, Ambasadën e SHBA-së, si dhe me një grup gazetarësh dhe redaktorësh, anëtarë të SHGM-së.
Këto takime realizohen në kuadër të “misionit për verifikimin e fakteve” të organizuar nga Shoqata e Gazetarëve të Maqedonisë. Në kuadër të këtij misioni, përfaqësuesit e SHGM-së dhe “Federatës Evropiane të Gazetarëve”, “Free Press Unlimited”, “International Media Institute”, “Qendra Evropiane për Lirinë e Shtypit dhe Medias”, dhe “Osservatorio Balcani e Caucaso”. Transeuropa”, zhvillojnë takime me aktorë të rëndësishëm për sektorin e medias dhe së shpejti do të publikohet një raport me gjetjet dhe rekomandimet.
