FFM me protokoll të ri për prani më të madhe të gazetarëve në ndeshjet sportive

Me kërkesë të Seksionit të gazetarëve të sportit të Shoqatës së Gazetarëve të Maqedonisë (SHGM) për të siguruar praninë e të gjithë gazetarëve në ndeshjet sportive, Federata e Futbollit të Maqedonisë (FFM) iu drejtua SHGM-së duke informuar se tashmë është përgatitur një protokoll i ri.

Për SHGM-në, në një letër zyrtare, Sekretari i Përgjithshëm i FFM-së, Filip Popovski, informoi se: “për shkak të faktit se protokolli është një dokument i cili mund të ndryshohet dhe duhet t’i përshtatet situatës reale në fushë dhe infrastrukturës që kemi në dispozicion të stadiumeve në tërë vendin, FFM përgatiti version të ri të protokollit, i cili tashmë është dorëzuar për aprovim në Komisionin e Sëmundjeve Infektive.” FFM gjithashtu informon se numri i gazetarëve, fotoreporterëve dhe kameramanëve është rritur dhe nëse protokolli miratohet nga Komisioni atëherë ai do të hyjë në fuqi menjëherë për të gjitha klubet dhe do të publikohet në ueb faqen e internetit të Federatës.

Seksioni i gazetarëve të sportit në gusht iu drejtua FFM-së dhe Komisionit për Sëmundje Infektive në Ministrinë e Shëndetësisë pasi SHGM-ja pranoi ankesa nga gazetarët dhe fotoreporterët se nuk u lejohej të raportonin nga stadiumet gjatë ndeshjeve sportive.

SHGM edhe më tutje do të vazhdojë të monitorojë organizimin e të gjitha ndeshjeve sportive në vend dhe do të intervenojë nëse pengohet puna e gazetarëve. Në të njëjtën kohë do të insistohet që organizatorët të marrin masa për punë të sigurt për gazetarët në aspekt të pandemisë, në mënyrë që të mund të garantojnë shëndetin e punonjësve mediatik.