FEG mbështeti SHGM-në: Të rishqyrtohet vendimi i gjykatës për 27 prillin
Më 27 prill, viti 2017, gjatë protestës në Shkup e cila më vonë rezultoi me ndërhyrje të protestuesve në ndërtesën e Kuvendit, gjithsej 21 gazetarë ishin nën kërcënim ose u ndalohej të raportojnë nga vendi i ngjarjes. Një prej tyre ishte Goran Trpenoski i cili dje ishte i refuzuar nga Gjykata Civile në Shkup sepse ajo nuk ia pranoi statusin e gazetarit. Federata Evropiane e Gazetarëve (FEG) dhe anëtarja e saj, Shoqata e Gazetarëve të Maqedonisë (SHGM) kontestojnë interpretimin e gjykatës maqedonase dhe i bëjnë thirrje që edhe një herë të rishqyrtojë vendimin e saj.
Goran Trpenoski raportonte për ngjarjet e 27 prillit për median online САКАМДАКАЖАМ.МК (sdk.mk). Pasi mori kërcënime, ai vendosi të ngrejë padi për pengimin e së drejtës së qasjes në informata dhe për shkaktim të dëmit psikologjik. Dje, në vendimin e saj, gjyqtarja Jovanka Spirovska Paneva shpjegoi se në atë kohë Trpenoski nuk ishte gazetar sepse ai ka qenë i punësuar në median online (sdk.mk), e cila sipas Ligjit për Media nuk konsiderohet si medium. Më tej në këtë vendim, gjykata nuk e njeh të drejtën e informacionit si një e drejtë kushtetuese.
FEG dhe SHGM besojnë se ky vendim shkel standardet ligjore evropiane për lirinë e shtypit, të përcaktuara nga Gjykata Evropiane e të Drejtave të Njeriut. Ky vendim gjithashtu shkeli praktikën gjyqësore të Gjykatës së Apelit në Maqedoni, sipas së cilës pozita nuk duhet t’u mohohet pozita e gazetarëve profesionistëve që punojnë në mediat online. FEG bashkohet me anëtaren e saj SHGM në kërkesën që ky vendim, që cenon lirinë e shtypit, të rishqyrtohet.Federata Evropiane e Gazetarëve (FEG) është organizata më e madhe e gazetarëve në Evropë, që përfaqëson më shumë se 320,000 gazetarë në 72 organizata gazetareske në 45 vende.
