Federata Evropiane e Gazetarëve me mbështetje për Regjistrin e online mediave profesionale

Federata Evropiane e Gazetarëve (FEG) përshëndeti Regjistrin për vetë-rregullimin e online mediave profesionale në Maqedoninë e Veriut, i cili u krijua nga Shoqata e Gazetarëve të Maqedonisë dhe Këshilli për Etikë në Mediat në Maqedoni (KEMM).

“Ne besojmë se organizatat gazetareske duhet të promovojnë standarde të larta etike në gazetari prej të cilëve do të përfitojë publiku. Këto standarde bazohen në pesë parime: e vërteta dhe saktësia, pavarësia, drejtësia dhe ndershmëria, humanizmi dhe përgjegjësia,” tha sekretari i përgjithshëm i FEG-së, Rikardo Gutierez. “Prandaj, FEG mbështet këtë iniciativë profesionale me qëllim të forcimit të vetë-rregullimit të mediave në Maqedoninë e Veriut,” shtoi ai.

Përkujtojmë që rreth 70 media online kanë arritur të hyjnë në Regjistrin në fazën e parë, ndërsa nga 1 janari i vitit të ardhshëm, në ueb faqen tonë www.promedia.mk do të ketë detaje për të gjithë anëtarët e Regjistrit.