Ekipi i Alsatit është penguar në kryerjen e punës së tyre

Shoqata e Gazetarëve të Maqedonisë (SHGM) kërkon reagim të menjëhershëm nga Komuna e Sarajit në lidhje me incidentin e djeshëm me ekipin e Alsat-it, ku ata u penguan të filmonin nga ana e banorëve të fshatit në fjalë

Dje në mesditë ekipi i Televizionit Alsat i përbërë nga Melihate Rustemi (gazetare) dhe Bojan Kostovski (kameraman) janë penguar të kryejnë punën e tyre. Ekipi ka mbërritur në fshatin Svillare e Epërme (komuna e Sarajit) pas informacioneve të marra paraprakisht se banorët nuk kanë ujë të pijshëm. Pas disa minutash xhirime, është shfaqur një person me rroba civile, i cili në mënyrë agresive ka penguar ekipin që të filmojnë aty dhe ka kërkuar që ekipi të largohet nga fshati brenda 5 minutave duke theksuar se ai është “personi kryesor” aty. Ai kërkoi këtë gjë nën arsyetimin se informacionet për mungesë të ujit nuk janë të sakta, por pa lënë hapësirë që kjo gjë të konfirmohet. Në të njëjtën kohë, ai ka kërkuar nga gazetarja e televizionit leje për të xhiruar.

Gazetarja Rustemi së bashku me kameramanin Kostovski, pas arsyetimit se xhirimi në hapësira publike nuk kërkon leje nga institucionet përkatëse dhe konflikt verbal që zgjati disa minutash, dhe pas shfaqjes të disa personave të tjerë, me qëllim të shmangies së konfliktit, u detyruan të largoheshin nga vendngjarja dhe të gjenin një vend tjetër për të filmuar.

Ekipi i TV Alsat ka regjistruar të gjithë konfliktin verbal, i cili është transmetuar edhe në edicionet e lajmeve të televizionit.

SHGM thekson se sjellja e tillë ndaj gazetarëve kontribuon ndaj censurës së tyre. Për këtë arsye, kërkojmë nga MPB të merren masa konkrete ndaj personit në fjalë, në mënyrë që në të ardhmen të mos pengohet e drejta e gazetarëve për punë dhe e drejta e qytetarëve për tu informuar.