E drejta e autorit dhe (mos)respektimi në punën e fotoreporterëve
Obligimet ligjore gjatë shfrytëzimit të fotografive autoriale, praktika modeste gjyqësore për të drejtat e autorit në kontekstin maqedonas, por edhe nevoja e një shoqate kolektive për mbrojtjen e të drejtave të fotoreporterëve ishin ndër temat e takimit të punës që u mbajt në SHGM, me iniciativë të seksionit të fotoreporterëve në SHGM. Të pranishëm ishin një grup fotoreporterësh profesionistë, si dhe palë të interesuara nga industria mediatike, si dhe eksperti kombëtar për të drejtat e autorit Valentin Pepelugoski.
Kolegëve të pranishëm iu drejtua drejtori ekzekutiv i SHGM-së, Dragan Sekullovski, i cili foli për atë që SHGM ka punuar në këtë temë në periudhën e kaluar, por edhe për trendet e fundit në kontekst të shfrytëzimit të pa autorizuar të fotografive nga mediat në Maqedoni.
Në takimin e punës, fotoreporteri Tomisllav Georgiev tha se, “në ditët e sotme, ne kemi mundësinë të kodojmë fotot tona në mënyrë që të mund të parandalojmë disi vjedhjet e mundshme të veprave autoriale në të ardhmen. Në kontekstin e kësaj, ne duhet të mendojmë për formimin e një lloj platforme përmes SHGM-së për të krijuar softuer ku mund t’i vendosim fotot tona me një lloj logoje, ku do të kishim kontroll mbi vjedhjen e mundshme të fotografive”, tha Georgiev.
Koordinatori i seksionit të fotoreporterëve në SHGM, Petr Stojanovski, theksoi se në kuadër të mbrojtjes së të drejtave të autorit, në vendin tonë ka një trend të përmirësimit të situatës, gjegjësisht të shfrytëzohen më pak fotografi me të drejta autori, si dhe praktikë të agjencive të huaja në fushën e mbrojtjes së të drejtave të autorit si dhe sfidat në kontekstin e brendshëm. Ka disa portale që kryejnë me këmbëngulje shkelje të tilla, por kjo është koha e duhur për të arritur realisht një konsensus të përbashkët në drejtim të zgjidhjes së këtij problemi përmes gjykatës.
Avokati Valentin Pepelugoski theksoi se ekzistojnë dy mënyra të mbrojtjes së fotoreporterëve, mekanizmi i parë është jashtëgjyqësor dhe i dyti përmes padive para gjykatave kompetente.
“Në fillim duhet të hiqni emocionet dhe duhet të duroni, sepse pirateria nuk do të zhduket kurrë. Pavarësisht paralajmërimeve, gjithmonë do të ketë shkarkime të paautorizuara të përmbajtjes. Organizimi kolektiv është një opsion real që e lejon ligji, ku të gjithë ju si anëtarë do të hartoni listën tuaj të çmimeve, duke lehtësuar kështu punën e prokurorisë dhe gjykatës në një procedurë të mundshme. Duhet të mendoni se si ta përpiloni listën tuaj të çmimeve në mënyrë që të shmangni ekspertizën e shtrenjtë, duke theksuar se nëse ekziston një listë e tillë e çmimeve, gjithmonë mund t’i referoheni”, tha Pepelugoski.
Të pranishmit patën rastin të debatojnë mbi temën dhe të konstatojnë disa konkluzione që në të ardhmen do të rezultojnë me hapa dhe aktivitete praktike në drejtim të mbrojtjes më të madhe të veprës së autorit, jo vetëm për fotoreporterët, por edhe për të gjithë punonjësit e medias në vend.
