DokazM veproi në mënyrë joetike ndaj ministrit Popovski

Këshilli i Nderit i Shoqatës së Gazetarëve të Maqedonisë javën e kaluar shqyrtoi afër dhjetë ankesa të qytetarëve dhe organizatave, të cilët ankohen për raportim joetik të gazetarëve.

Këshilli i Nderit, duke e shqyrtuar ankesën e ministrit për transparencë dhe llogaridhënie Robert Popovski, në lidhje me një tekst të botuar në portalin DokazM, në të cilin ankuesi është etiketuar si përdhunues, konstatoi më shumë shkelje të Kodit të gazetarëve. Sipas Këshillit, teksti në fjalë përmban etiketime dhe fyerje ndaj Popovskit, ndërsa gazetari nuk është përpjekur t’i kontrollojë informatat e publikuara.

“Publikimi i teksteve të tilla nuk ka asgjë të përbashkët me lirinë e mediave, por përkundrazi, ato e mohojnë lirinë e mediave dhe e degradojnë profesionin e gazetarisë”, thuhet në mendimin e Këshillit të Nderit.

Këshilli e refuzoi edhe ankesën e dërguar nga Nenad Zhivanovski kundër gazetës ditore “Slloboden Peçat”, e cila më 15 maj publikoi fotografi në të cilën ishte i ilustruar raporti nga protesta para Kuvendit, me titull: “Vmrovcite gi pokazhaa zabitë”. Këshilli vlerësoi se fotografia është autentike nga protesta, ndërsa personat e fotografuara në protesta duhet të dinë se mund të jenë nën vëzhgimin e mediave.

“Gazetarët kanë drejtë të raportojnë nga kënde të ndryshme për ngjarjet që janë në interes të publikut, ndërsa pluralizmi në media është pjesë e rëndësishme e lirisë së të shprehurit”, konstaton Këshilli i Nderit.

Këshilli nuk gjeti shkelje të Kodit Etik të Gazetarëve as në lëndën e portalit “Republika”, i cili më 12 dhjetor vitin e kaluar ka publikuar deklaratë të rreme të biznesmenit Minço Jordanov, në të cilën ai paralajmëron padi me qëllim që të mbrojë emrin e gazetës së tij, nëse zgjidhja e çështjes së emrit është “Nova Makedonija”.

Sipas Këshillit, në këtë rast është evidente se bëhet fjalë për tekst satirik, me të cilin portali shpreh qëndrim të caktuar në lidhje me negociatat për emrin. “Ne besojmë se këto tekste nuk duhet të kuptohen në kuptimin literal. Kjo mënyrë e të shprehurit është legjitime”, thuhet në mendimin e Këshillit.

Dy ankesa Këshilli vendosi mos t’i shqyrtojë sepse ishte e qartë se ankuesit kanë qëllim të ngrisin padi për shpifje. Këshilli mendon se është e papranueshme gazetarët të dënohen dy herë, edhe nga gazetarët edhe nga gjyqi. Qëllimi i vetë-rregullimit është të shqiptojë sanksion moral ndaj gazetarëve, ndërsa ana e prekur të fitojë kënaqësi morale.