Deputetët nuk duhet t’i përçmojnë dhe etiketojnë gazetarët e Tv Telma

Në dy ditët e fundit, disa nga deputetët e VMRO DPMNE si dhe deputeti nga “E Majta” në deklaratat e tyre e etiketuan TV  Telma si “televizion i regjimit”, ndërsa fyerje dhe përçmime u drejtuan direkt ose indirekt gazetarëve dhe redaktorëve të këtij televizioni kombëtar.

Etiketimi publik i mediave dhe gazetarëve, veçanërisht nga përfaqësues të lartë të partive politike dhe deputetë, e kërcënon lirinë e mediave dhe i promovon përpjekjet për censurë dhe vetëcensurë.

E drejta për debat politik dhe e drejta për lirinë e shprehjes, veçanërisht në Kuvendin e RMV-së, janë parime të rëndësishme përmes të cilave deputetët pritet të kalojnë ligje cilësore përmes argumenteve dhe debateve konstruktive. Abuzimi i këtyre të drejtave nga politikanët për konfrontim publik me gazetarë dhe media ndikon negativisht në lirinë e mediave, diskualifikon dinjitetin gazetaresk të gazetarëve profesionistë dhe, për më tepër, demonstron pakulturë politike në diskursin publik. Përveç kësaj, ky fjalim agresiv inkurajon mbështetësit e këtyre partive politike që të konfrontohen edhe më tej, por edhe të kërcënojnë gazetarët, veçanërisht në rrjetet sociale në internet.

Përveç kësaj, ky sulm verbal drejtuar kolegëve tanë nga TV Telma paraqet shkelje të Kodit të Sjelljes Etike të Deputetëve. SHGM u kujton deputetëve se ata kanë për detyrë të respektojnë Kodin, i cili në nenin 6 thotë: “Deputeti nuk duhet të përdorë fjalë dhe shprehje me të cilat do të cenojë ose përçmojë persona të tjerë, dinjitetin e njeriut dhe do të nxisë urrejtje, intolerancë dhe dhunë”.

U bëjmë thirrje deputetëve dhe të gjithë aktorëve politikë që, nëse ata vlerësojnë se një media e caktuar shkel standardet profesionale, gjithmonë mund të parashtrojnë ankesë në Këshillin Etik për Media në Maqedoni dhe në Këshillin e Nderit pranë SHGM-së. Rikujtojmë se pavarësia redaktuese dhe gazetareske është e pacenueshme dhe nuk guxon të jetë nën presionin e politikanëve ose pronarëve të mediave. Ne kërkojmë nga gazetarët të qëndrojnë larg interesave të biznesit dhe politikës, të udhëhequr vetëm nga parimet e raportimit profesional dhe etik dhe interesit publik.