Shoqata e Gazetarëve të Maqedonisë (SHGM) dhe Sindikata e Pavarur e Gazetarëve dhe Punonjësve Mediatik (SPGPM) dënojnë sulmin ndaj ekipit gazetaresk të Al Xhezirës dhe kërkojnë nga MPB-ja të sanksionojë sulmuesin, për të cilin sulm ekziston video publike në dispozicion nga ngjarja.

Në protestën e organizuar sot në qendër të Shkupit nga partia politike VMRO-DPMNE gazetarja Milka Smilevska dhe kameramani Jorde Angelloviq nga media Al Xhezira u sulmuan dhe u penguan në kryerjen e detyrave të tyre profesionale gazetareske nga një person i panjohur. Sipas videove dhe deklaratave të gazetares lidhur me incidentin, personi i panjohur pasi i ka pyetur se nga cili medium janë, ai ka pasur kontakt fizik me ta dhe me pas ka shtyrë mikrofonin e gazetares.

Gazetarja Smilevska e ka denoncuar incidentin në vendngjarje tek zyrtari i MPB-së, e më pas personi i panjohur është tërhequr anash, ndërsa zyrtari policor ka thënë se do të iniciohet procedurë adekuate për kundërvajtje për sulmuesin.

Trajtimi i këtillë ndaj gazetarëve në detyrë në terren është i papranueshëm dhe duhet të ndëshkohet ashpër nga Ministria e Punëve të Brendshme. sepse dhuna ndaj gazetarëve nuk lejohet në vendet demokratike. Nëse incidente të tilla tolerohen në të ardhmen, ekziston rreziku që të inkurajohet dhunë e re edhe më serioze ndaj gazetarëve, duke rrezikuar kështu edhe më tej sigurinë e tyre, të drejtën e lirisë së shprehjes, si dhe të drejtën për të informuar qytetarët.