Dënim për komunikimin jo të duhur të komunës së Strugës me gazetarët 

Komuna e Strugës gjatë ditës së djeshme (05.10) ka publikuar një deklaratë në faqen e saj zyrtare në Facebook, ku në mënyrë të pahijshme, përmes akuzave të rënda, ka tentuar të diskreditojë mediat në Ohër. 

“Fatkeqësisht, duhet të theksojmë se shumica e problemeve dhe vështirësive që janë shfaqur dhe ekzistojnë ende në rajonin e Ohrit burojnë nga Komuna e Ohrit dhe drejtuesit e saj, të cilët vazhdimisht, nën patericën e mediave, organizatave dhe lobistëve të paguar prej tyre, sulmojnë komunën tonë për çdo aspekt në çdo kohë dhe vend, pa asnjë argument”- shkruhet në një pjesë të njoftimit.

Veprimet e komunës si institucion publik, duket se janë një përpjekje për të diskriminuar mediat dhe për të heshtur gazetarët vendas përmes censurës. Problem shtesë është fakti se në njoftim pretendohet se mediat paguhen nga komuna e Ohrit.

Kujtojmë se zyrtarët janë përgjegjës para qytetarëve për punën e tyre, ndaj çdo përpjekje për të mbyllur gojën e gazetarëve nxit mosbesimin ndaj institucionit dhe ndikon në transparencën e tij, sepse mediet dhe gazetarët janë kanali i komunikimit me publikun.

Nëse ndonjë qytetar, institucion publik, ka ndonjë problem me ndonjë shkrim nga ndonjë medie e caktuar, ekzistojnë mekanizma për mbrojtje ligjore, si kërkesa për korrigjim apo demantim. Përveç kësaj, në dispozicion të mediave janë edhe mekanizmat vetërregullues përmes Këshillit të Nderit në SHGM dhe Këshillit për Etikë në Media në Maqedoni (KEMM).

Ky incident do të shënohet edhe në raportet vjetore për lirinë e shprehjes si shembull negativ i komunikimit të keq të institucioneve publike me gazetarët dhe mediat.