Bashkëpunim për lirinë e mediave: SHGM në takim me gjyqtarët e Gjykatës Themelore Civile
Përfaqësues të Shoqatës së Gazetarëve të Maqedonisë (SHGM) realizuan sot një takim pune me gjyqtarë të Gjykatës Themelore Civile në Shkup. Në takim u diskutua për mundësitë e përmirësimit të transparencës, marrëdhënieve profesionale dhe mirëkuptimit mes komunitetit mediatik dhe institucioneve të drejtësisë.
Një nga temat konkrete të diskutimit ishte aktualiteti i padive kundër gazetarëve dhe mediave, të njohura si SLAPP (Strategic Lawsuits Against Public Participation – Padi Strategjike Kundër Pjesëmarrjes Publike), si dhe nevoja për një qasje sistematike dhe kujdes gjatë trajtimit të padive për fyerje dhe shpifje. Kryetari i SHGM-së, Çadikovski, theksoi se këto procedura shpesh përdoren si presion ndaj gazetarëve dhe përbëjnë rrezik për lirinë e shprehjes dhe lirinë e mediave.
Në takim morën pjesë edhe përfaqësues të Shoqatës së Mediave Online, të cilët, së bashku me SHGM-në, ndanë qëndrimet dhe propozimet e tyre për përmirësimin e kornizës ligjore dhe zbatimit praktik të ligjeve që prekin median.
Në këtë drejtim, u theksua nevoja për krijimin e një regjistri të padive për fyerje dhe shpifje kundër punonjësve mediatikë, si një instrument për rritjen e transparencës dhe ndjekjen e praktikës gjyqësore – një praktikë e rekomanduar edhe nga Këshilli i Evropës. Gjyqtarët shprehën gatishmëri për të shqyrtuar mundësinë e krijimit të këtij regjistri në të ardhmen.
Gjithashtu, u nënvizua rëndësia e bashkëpunimit institucional përmes organizimit të rregullt të trajnimeve dhe punëtorive mes gazetarëve, gjyqtarëve dhe administratës gjyqësore. Aktivitetet e tilla do të ndihmonin në një mirëkuptim të ndërsjellë më të mirë mbi liritë mediatike, standardet etike të gazetarisë dhe praktikën gjyqësore në lëmin e përgjegjësisë civile.
Gjyqtarët u informuan edhe për rregulloren e re për mediat online, me theks në rëndësinë e vetërregullimit dhe parimeve të transparencës, llogaridhënies dhe profesionalizmit në hapësirën digjitale mediatike.
