Autoritetet shëndetësore të mos pengojnë punën e gazetarëve
Shoqata e Gazetarëve të Maqedonisë (SHGM) dhe Sindikata e Pavarur e Gazetarëve të Maqedonisë (SPGM) reagojnë ndaj pengimit të punës së ekipeve të gazetarëve që po ndodhë në ambientet e Spitalit të Përgjithshëm të Qytetit “8 Shtatori” në Shkup.
Sipas shumë denoncimeve nga kolegët që kanë mbërritur në zyrat e SHGM dhe Sindikatës së Gazetarëve, gjatë fundjavës dhe sot gazetarëve dhe kameramanëve nuk u është lejuar hyrja nga sigurimi i spitalit dhe, madje, ishin ndjekur në parkingun e spitalit.
Duam t’ia bëjmë me dije Ministrisë së Shëndetësisë dhe menaxherëve të SPQ “8 Shtatori” se ata nuk duhet të kufizojnë praninë e gazetarëve për të raportuar mbi tema që lidhen me punën e spitalit dhe pandeminë.
Të vetëdijshëm për ndjeshmërinë e temave për të cilat ka interes të veçantë publik, është e nevojshme të sigurohen kushte ku gazetarët do të kenë mundësi të raportojnë pa probleme. Rikujtojmë se liria e shprehjes është e drejtë e garantuar me kushtetutë në Republikën e Maqedonisë së Veriut të cilën asnjë individ nuk mund ta kufizojë, sepse me këtë do të ishte shkelej neni 16 të Kushtetutës, e sidomos kur bëhet fjalë për tema me interes të jashtëzakonshëm publik.
Gazetarët dhe ekipet redaktoriale, veçanërisht në kushte të tilla krize, duhet të raportojnë në përputhje me parimet etike të profesionit të gazetarisë duke mbrojtur privatësinë e qytetarëve që mund të jenë pjesë e materialit të filmuar. Rikujtojmë se sipas Kodit të Etikës së Gazetarëve, gazetari do të respektojë privatësinë e personalitetit, përveç kur një gjë e tillë është në kundërshtim me interesin publik, dhe gazetari është gjithashtu i detyruar të respektojë dhimbjen dhe pikëllimin personal.
Nëse qytetarët kanë vërejtje për punën e gazetarëve dhe mediave, i kujtojmë ata se kanë mundësi të parashtrojnë ankesa në Këshillin e Nderit ose Këshillin për Etikë në Media në Maqedoni. Në të njëjtën kohë, ne i kërkojmë Ministrisë të tërheqë vendimin për filmim para qendrës së triazhit dhe rreth spitalit “8 Shtatori” vetëm me lejen e drejtorit të spitalit ose Ministrisë, sepse me këtë pamundësohet drejtpërdrejt puna e gazetarëve dhe fotoreporterëve që raportojnë për krizën e kovidit dhe gjendjen në spitale.
