Советот на Европа алармира за рестриктивните измени во Изборниот закон за медиумите

Советот на Европа вчера на својата платформа за заштита на новинарството и безбедноста на новинарите објави јавно предупредување за измените и дополнувањата на Изборниот законик, кои можат да имаат негативно влијание врз слободата на медиумите во Македонија. Во предупредувањето стои дека македонската држава е изворот на ваквото загрозување на слободата на медиумите.

Ова предупредување  следи по барање на Здружението на новинарите на Македонија до платформата на Советот на Европа, која во нејзината реакција се повикува на заедничкото соопштение на ЗНМ, Независниот синдикат на новинари и Советот за етика.

„Измените на Изборниот законик беа усвоени на 25 јули 2018 година од страна на македонскиот парламент во брза постапка, како резултат на политичкиот договор меѓу водачите на четирите главни политички партии. Еден од амандманите на Изборниот законик ја овластува Државната изборна комисија да ги регистрира и следи известувањето на онлајн медиумите за време на изборите. Покрај тоа, членот 181a од законот предвидува казни до 4.000 евра за традиционалните и онлајн медиумите за “неизбалансирано или непристрасно известување”, стои во предупредувањето на платформата на Советот на Европа.

Предупредувањето е упатено до Собранието на Македонија, кој во наредниот период има обврска да ги објасни овие измени кои што ја ограничуваат слободата на медиумите.

#Macedonia Following amendments to the electoral code, the Election Commission can fine media for ‘unbalanced reporting' https://t.co/W6M8uWp5i8 @EFJEUROPE @IFJGlobal

— CoE Media Freedom (@CoEMediaFreedom) August 9, 2018