Софтвер за безбедна комуникација на новинаритe

Извршниот директор на ЗНМ Драган Секуловски и кординаторот Никола Наумовски минатата недела во Скопје се сретнаа со претставникот на Еуро-медитеранска мрежа на ресурси од Лондон, Умит Узтурк.

Тема на разговорот беше подобрување на безбедноста на комуникацијата на новинарите од балканскиот регион. Соговорницитесе согласија дека постои потреба за зголемување на безбедноста на комуникацијата на ноцвинарите, за да се заштититат од можноста да бидат прислушкувани од властите, како што беше случајот во Македонија.  Узтурк сметаше дека прислушкувањето на новинари не е изолиран случај само во Македонија, туку со таа појава се соочуваат сите новинари од балканскиот регион. Поради тоа, Узтурк, понуди технички решенија преку соодветни софтвери, кои ќе помогнат да се намали ризикот властите да ги следат комуникациите на новинарите. Беше разговарано за можноста овие софтвери да им се понудат и на македонските новинари, членови на ЗНМ.

Секуловски и Узтурк изразија загриженост за влошување на безбедноста на новинарите во регионот, која ја зголемува потребата за меѓусебно вмрежување на новинарите и разни граѓански активисти. Тие потенцираа дека како во Македонија, така и во земјите од регионот, се зголемува бројот на нападите против новинари, додека властите не покажуваат интерес да ги казнат прекршителите. Освен тоа, во регионот новинарите се притварат заради нивната работа, физички и вербално се напаѓаат, а дел од нив поради притисоците од властите дури се принудени и да живеат во егзил.

Поради влошување на состојбата со безбедноста на новинарите двете страни изразија подготвеност да ја прошират и подобрат соработката преку вклучување на ЗНМ во  заедничка платформа за воспоставување безбедна комуникација на новинарите.
Умит Узтурк е поранешен претседател на новинарската мрежа на Амнести Интернешнл и долгогодишен борец за правата на новинарите. Поради неговата активност во изминатите 20 години Узтурк е политички прогонет од страна на турските власти.

Тој моментално живее во Лондон, Велика Британија и постојано се интересира за  состојбите во државите од медитеранскиот регион, каде активно работи на подобрување квалитетот на демократијата и за промоција на човековите права.

Скопје, 14.11.2016

Здружение на новинарите на Македонија