Претставници на ЗНМ на средба со амбасадорот Чарлс Гарет

Претставници на Здружението на новинарите на Македонија вчера се сретнаа со британскиот амбасадор во Македонија, Чарлс Гарет, на која се разговараше за безбедноста на новинарите и реформите во медиумите.

Претседателот на ЗНМ, Насер Селмани рече дека најдобар начин да се спречат нови напади на новинари е да се истражат старите, а насилниците мора да се изведат пред лицето на правдата. Селмани изрази разочарување што месецов полицијата без сериозна причина приведе двајца новинари во полициска станица.  Според него, полицијата треба да има поголема доверба во работата на новинарите затоа што нивната професија не е злосторство.

На средбата беше разговарано и за зајакнување на капацитетите на Македонската радио телевизија. „Без политичка и финансиска независност, МРТ нема да ја исполни мисијата како јавен радиодифузен сервис на граѓаните“, истакна Селмани.

Тој исто така, го запозна амбасадорот Гарет со иницијативата на владата да го измени медиумското законодавство. „Очекуваме процесот да биде транспарентен и сеопфатен, во кој преку аргументирана дебата ќе дојдеме до најдобрите решенија“, рече Селмани.