Претставена публикација за примена на законот за граѓанска одговорност за клевета и навреда

Здружението на новинарите на Македонија денеска ја презентираше публикацијата: „Примената на Законот за граѓанска одговорност за клевета и навреда во судските постапки против новинари“. Автори на публикацијата беа новинарките Маја Јовановска и Гордана Дувњак.

Во оваа публикација анализирани се вкупно седум судски случаи за кои се донесени правосилни пресуди. Во сите седум случаи, тужбените барања се одбиени како неосновани, односно не е утврдена одговорност на тужените новинари за клеветничко изразување. Во моментов, според сознанијата на ЗНМ, во судска постапка има околу 39 случаи против новинари, и тие не се опфатени со анализите бидејќи за нив се уште не се донесени правосилни пресуди.

На промоцијата на анализата говореше извршниот директор на Здружението на новинарите на Македонија кој ги истакна аспектите преку кои се анализирани седумте пресуди. „Седумте пресуди се анализирани од неколку аспекти: времетраењето на постапката; изведувањето докази од страна на судиите; проценката на судијата за балансот меѓу јавниот интерес и заштитата на честа и угледот на тужителите; начинот и мерата во која судиите во образложението на пресудата се повикуваат на судската пракса на Европскиот суд за човекови права“, рече тој.