Повик за прекинување на насилството против новинарите

Новинарите уште еднаш го кренаа гласот против прогонот и насилството што врз нив ја врши власта. Ваков повик од Велес упатија членовите на Здржението на новинарите на Македонија, кои во саботата учествуваа во работата на второто Редовното неизборно собрание на ЗНМ. Во усвоената декларација, новинарите барат да прекине прогонот на нивните колеги и да се ослободи новинарот Зоран Божиновски.

Недозволиво е новинарите да бидат третирани како глинени гулаби и да бидат постојано под најразличен прогон, се вели во усвоената декларација од Собранието.

Освен тоа, тие ги осудиуја сите обиди за законска регулација на интернет порталите. Според нив, таквото барање има за цел да ја дефокусира дебатата за вистинските причини за отсуство на медиумските слободи во Македонија. Онлине медиумите ги имаат сите законски права и обврски како и традиционалните медиуми, се вели во декларацијата.

Собранието на ЗНМ се противи и на идејата за регулирање со закон на медиумските содржини. Новинарите сметаат дека новинарската етика единствено може да биде предмет на саморегулација на новинарите и медиумите.

Тие повикаа и за реформа на јавниот радиодифузен сервис, Македонксата радиотелевизија, која треба да има институционална автономија и независна уредувачка политика. „Ова цел може да се оствари само ако се департизираат и професионализираат управните органи  на МРТ и се обезбеди стабилен и одржлив извор на финансирање“, сметаат новинарите.

Инаку на редовното годишно собранието, раководството на ЗНМ поднесе Годишен извештај за работа на Здружението во 2016 година како и финансиски извештај. По конструктивната дебата, членовите на Собранието ги усвоија двата извештаи, со одредени предлози, кои одат во прилог на подобрување на работата на Здружението.

22 Април, 2017

Скопје

Здржението на новинари на Македонија