Осуда на кампањата за застрашување новинари
Здружението на новинарите на Македонија ја осудува кампањата на застрашување и понижување на новинари што последните денови во Скопје ја спроведуваат непознати лица инспирирани од воинствените изјави на претседателот на ВМРО-ДПМНЕ Никола Груевски, кој минатат недела ги повика етничките Македонци преку протести да ја спречат опозицијата да формира влада со партиите на Албанците.
Кукавички е Груевски да ги инструментализира младите за изврзшување на валканите работи изложувајќи ги нив и нивните семејства на ризик за неговите политички интереси.
Вчерашната примитивна провокација кон новинарот Борјан Јовановски, кој беше исплукан во ресторан и вознемирувањето во семејниот дом на новинарот Бранко Тричковски, е директен напад врз слободата на изразување.
Предупредуваме дека ваквите провокации можат да есклаираат во физичко насилство врз новинарите со несогледливи последици. Незамисливо е во 21 век во Македонија новинарите да бидат изложени на притисок и малтеретирање за јавно искажан став.
Оваа срамна кампања има за цел да ги заплаши и замолчи новинарите и останатите граѓани и сите неистомисленици на власта. Груевски добро знае дека само неинформирани граѓани можат да бидат лесно манипулирани и вовлечени во конфликт.
Го повикуваме Груевски да престане со ширење на говор на омразам што поттикнува насилство и да ги вразуми и смири неговите следбеници. Овој повик се однесува и на сите политичари и јавни личности да се воздржат од ваков воинствен реченик.
Апелираме да сите новинари и медиуми да известуваат професионално и да не долеваат масло на огнот. Само на тој начин ќе помогнат да се смират тензиите.
Здружение на новинарите на Македонија
3 Март, 2017
Скопје
